Labada maalmood ee 26 iyo 27ka bishan aynu jirno oo ah bisha labaad ee sannadka 2015 waxa ka furmi doona, barnaamij loogu magacdaray (Dhaqanka iyo Farshaxanka Soomaalida) hoyga la magac baxay ANDRA HEMMET ee ku yaalla xaafadda Skärholmen oo ku taalla dhinaca koonfureed ee magaalada Stockholm. Maalmaha todobaadka soo socda waxa la fasaxaa ardayda si ay u sameeyaan ciyaaro---gaar ahaan barafka oo maalmahaa laga faa'iidaysto si loogu ciyaaro oo loo safro buuraha dhaadheer ee barafku ku gedaamanyahay.
Ardaydu uma wada safarto buurahaas, barafkana ma wada ciyaaraan, sidaa darteed ayaa xaafadda Skärholmen oo ay hormood ka yihiin guddida waalidiinta soomaalida ee Skärholmen u soo diyaariyeen ardayda iyo guud ahaanba dadka ku nool magaalada Stockholm. Carruurta yaryar waxa loo samayn doonaa ciyaaro, sawirro iwm, dhallinyarada iyo dadka waaweyn waxa ay labada maalmoodba daawandoonaan oo dhegaysan doonaan arrimo farabadan oo kala jaadjaad ah sida: Muxaadarooyin, Arrimaha bulshada, Suugaanta soomaalida, Farsoomaaliga iyo Sooyaalkiisii, Qaybaha maansada soomaalida, buugaag la soo bandhigi doono, gaar ahaan qisadii Cilmi Boodheri. Waxa maalinta 27ka lagu soo afmeerayaa, Masraxiyad iyo majaajillo la baxday "Tayo beelka Carruurtu Waalid buu tebayaa" oo uu curiyey Muuse Maxamuud Ciise Dalmar.
Waxa aad la kulmi doontaa siyaasiyiin uu ka mid yahay Xildhibaan ka tirsan Baarlamaanka Iswidhan oo magaciisu yahay Amiir Aadan. Odayaasha goobta ka hadli doona waxa ka mid ah: Maxamed Xirsi Guuleed, Cumar Xaaji Bile, Yuusuf Xaaji Cabdillaahi Xasan. Waxa aan ka maqnayn guddida hawshan soo diyaarisay oo ah Somaliska Föräldrar Forum i Skärholmen (Guddida waalidiinta soomaalida ee xaafadda Skärholmen, oo uu furitaanka furi doono guddoomiye Cabdiwahaab Jirde.
FG: Haddii aad degentahay Stockholm waa ay kuu furantahay in aad maalintaa nagala soo qaybgasho. Haddii Eebe Idmo.
Kommentarer
Skicka en kommentar