Maalintii Sabtida ee taariikhdu ahayd 29/04/2017 oo loo ballansanaa bandhigga Buugga Duco-Qabe oo ah buug lagu soo ururiyey Sooyaalkii IHN, Maxamed Xaaji Ibraahin Cigaal, ayaa la isugu yimi Guriga Dadweynaha ee xaafadda Rinkeby ee magaalada Stockholm. Bilawgiiba waxa cod-baahiyaha uga mahad celiyey ka sooqayb galayaashii bandhigga Guddoomiyaha Ururka "Somali Nordic Culture" Muuse Maxamuud Ciise (Dalmar).
Eraygaa soo dhawaynta ka dib, waxa hadal kooban oo furitaan iyo aayaadka Qur'aanka Kariimka ah ku bilaabay Maxamed Xaaji Ismaaciil, oo ka mid ah odayaasha reer Stockholm. Waxa uu Maxamed ku tilmaamay Maxamed Xaaji Ibraahin Cigaal inuu ahaa nin dad iyo dal aqoon ahaa, taasoo qofka hoggaamiye noqonaya looga baahanyahay.
Suldaan Gadhyare, oo isagu buugga soo akhriyey ayaa si heer sare ah u dhexgalay buugga iyo waxa uu ku saabsanyahay. Waxa uu si gaar ah u tilmaamay Qoraaga buugga qoray, Xasan Cabdi Madar oo uu ku tilmaamay in uu yahay nin u qalma in loogu yeedho Qoraa sare. Waxa uu taa ku sababeeyey in uu qoraagu iska ilaaliyey wax been noqon kara ama aan la hubin meesha laga soo xigtay. "Wax kasta xigashadeedii ayuu bayaaminayaa qoraagu. Buugguna waa buug loogu talo galay in Jaamacadaha laga dhigo. Sidaa waxa yidhi Suldaan Gadhyare, oo sii faahfaahiyey buugga iyo qaybaha uu ka koobanyahay. Waxaanuu yidhi: "Waxa uu ka kooban yahay Siyaasad, Hoggaamin, Nabadayn, Soyaal qof-ahaaneed iyo Taariikh guud.
Sayid-Axmed M Yuusuf ayaa isaguna baal kale iska taagay soo gudbintii buugga Duco-Qabe. Waxa uu soo qaatay codadkii laga duubay bilawgii 1960, ee uu kaga warramayey in Xornimadii la isla meeldhigay dawladdii Ingiriiska, weftigii Xamar tegey 1957kii, oo uu Cigaal ka warbixinayey, 7-10-1969 oo uu Cigaal Qaramada Midoobay kaga dooday in wax laga qabto Qaddiyadda Falastiin, lana aqoonsado dalweynaha Shiiinaha.
Waa uun maalmo yar ka hor Afgenbigii Milleterigu kula wareegay xukunkii Jamhuuriyaddii Soomaalida oo uu markaas Cigaal ahaa Raysal Wasaarihii Jamhuuriyadda. Waxa ka mid ahaa codadkii uu soo qaatay Sayid-Axmed, gabay uu Cigaal tiriyey intii uu xidhnaa. Halkan hoose ka dhegeyso gabaygaas.
Waxa isaguna hadal aad loogu sacbiyey ka jeediyey goobtii bandhigga buugga Dr. Kamaal Daahir Cashuur, oo sida uu sheegay Maxamed Ibraahin Cigaal uu waxbadan uga soo joogay. Si kalsooniyi ku jirto ayuu u yidhi: " Cigaal aniga Waalid oo kale ayuu ii ahaa" Waxa uu sheegay, in uu aad ugu faraxsanyahay buuggan laga qoray Halgamaa Maxamed Xaaji Ibraahin Cigaal.
Jaamac Maxamuud Cumar oo ku magacdheer Jaamac-Sweden ayaa eray kooban oo qiime leh ka jeediyey goobta. Waxa xusid mudan in uu Jaamac ka sheekeeyey taariikh ku saabsan qoys ahaan Maxamed Xaaji Ibraahin, aabihii iyo hooyadii iyo dhisiddii qoyskooda. Waxa uu tilmaamay in uu Xaaji Ibraahin Cigaal ahaa nin Maalqabeen ah, oo faxal ah, bixinta sadaqada na ku fiicnaa. Arrimahaas oo uu Jaamac yidhi: "Dee qaybahaasi malaa qoraaga may gaadhin oo buugga kumaan arag".
Inbadan oo buuggan soo akhriday waxa ay sheegeen in buuggan uu qoray qoraa, aad uga soo shaqeeyey hab-qoraalka buugga, habaynta, kala hormarinta, higgaadda, Jeldiga adag ee uu ku qurxiyey sawirka Cigaal iyo arrimo badan oo is biirsaday baa buuggan ka dhigay buug aad u tayo wanaagsan.
Inkastoo goobtu aanay ku koobnayn keliya Buugga la soo bandhigayey, waxa kaloo jiray maanso iyo Sheeko ay soo kala jeediyeen Cabdirasaaq, Ismaaciil iyo Shawqi. Saddexdooda oo si hufan oo aftahannimo ku dheehantahay u soo gudbiyey maansooyinkii iyo Sheekadii hal-abuurka ahayd. Buugga oo goobta yaallay ayaa dadweynuhu ay ka iibsadeen iyagoo aad arkaysay in dadka qaar ay labo ama saddex buug iibsanayeen, si ay hadyad ugu geeyaan ehel iyo asxaabba. Maalintaasi waxa ay ku soo afmeerantay jawi aad u wanaagsanaa.
Somaliland Nordic Culture
01-05-2017 Stockholm
Kommentarer
Skicka en kommentar