Weydiintii warcelinta heshay!
--------------------------------------------------------------------
Adeer Siciid Jaamac Xuseen Xirsi — Rabbi haw janno goglo e — sida looga wada marag-kacay, wuxu ahaa shakhsi noociisu dhif iyo naadir ahaa oo kalfuran. Balse iminka kama hadlayo shakhsiyaddiisii xaruurta ahayd ee waxaan rabaa inaan idiin faa'ideeyo weydiin aan weydiiyey warcelinteedii uu I siiyey oo noqon karta warcelin waafi ah oo inooga jawaabta weydiimo inaga dhex guuxaya. Sida aynu ognahay, hoggaamiyayaashii Soomaaliyeed ee ina soo maray waxa ay u badnaayeen dad iyaga oo da'dii 20-30ka ku jira saamayn siyaasi ah iyo mid aqooneed sameeyay. Nidaamyadii dowladeed ee kala danbeeyayna ku suntanaa dadkii sargooyey aragtida siyaasadeed ee bulsho, ha hanaqaadi waayaanba e. Tusaale waxaa inoogu filan Raysalwasaare iyo Madaxweyne Maxamed Xaaji Ibraahin Cigaal, Ahun, wuxu hoggaankii ururkii SNL noqday isaga oo dhowr iyo labaatan jir ah. Halka uu noqday saxeexihii xorriyadda Somaliland British Protectorate 1960kii isaga oo aan weli gaadhin soddon jir.
Siciid Jaamac Xuseen (IHN)
Adeer Siciid Jaamac Xuseen Xirsi — Rabbi haw janno goglo e — sida looga wada marag-kacay, wuxu ahaa shakhsi noociisu dhif iyo naadir ahaa oo kalfuran. Balse iminka kama hadlayo shakhsiyaddiisii xaruurta ahayd ee waxaan rabaa inaan idiin faa'ideeyo weydiin aan weydiiyey warcelinteedii uu I siiyey oo noqon karta warcelin waafi ah oo inooga jawaabta weydiimo inaga dhex guuxaya. Sida aynu ognahay, hoggaamiyayaashii Soomaaliyeed ee ina soo maray waxa ay u badnaayeen dad iyaga oo da'dii 20-30ka ku jira saamayn siyaasi ah iyo mid aqooneed sameeyay. Nidaamyadii dowladeed ee kala danbeeyayna ku suntanaa dadkii sargooyey aragtida siyaasadeed ee bulsho, ha hanaqaadi waayaanba e. Tusaale waxaa inoogu filan Raysalwasaare iyo Madaxweyne Maxamed Xaaji Ibraahin Cigaal, Ahun, wuxu hoggaankii ururkii SNL noqday isaga oo dhowr iyo labaatan jir ah. Halka uu noqday saxeexihii xorriyadda Somaliland British Protectorate 1960kii isaga oo aan weli gaadhin soddon jir.
Sida oo kale adeer Siciid Jaamac Xuseen, wuxu noqday Xoghayihii guud ee Xisbigii Xoogsatada Soomaaliyeed isaga oo aan gaadhin da'da soddon jirka! Keligood uun maaha ee wad uun.
Marka ay halkaa marayso, annaga oo Siciid la sheekaysanayna maalin ramadaan ah, ahaydna wakhtigii ugu badnaa ee aanu wada qaadanno adeer Siciid, Ahun, ayaanu aniga iyo Sakariye Faysal Cagaf oo ahayn labada qof ee maalintaas wakhtiga la qaatay aanu weydiinnay:
"Adeer wakhtigiinii miyuu naga barako badnaa mise idinkaa naga tayo roonaa? Waayo idinka oo da'dayada aannu u badanahay ah baad saamayn, magac iyo waxtar yeelateen, halka annaga oo soddonkii ah ama dhaafnay aanu haddana weli aqoontayadii iyo xirfaddayadii aanu muujin kari la'nahay e?"
Inta uu si kaftan, jalbeebin, muusood iyo qosol leh (Sidii caadada u ahayd) uu noo eegay, ayuu warcelin aanu ku qanacnay noo galay oo yidhi:
"Sakariye iyo Cabdicasiisoow, arrintu maaha sida aad u moodaysaan ama ka malaysanaysaan. Wakhtigu wakhtigii maaha oo annaga wakhtigayagii ma jirin cid naga waaweyn oo aqoon, firfircooni iyo fadallo-caddayn loo tuhmaayey. Anaga ayaa nasiibsannay oo noqonay da'dii aqoon la fahmi karo iyo far-hunguri ku hawlgeli karaysey oo sidaas ayaanu u noqonay kacaan wixii loo dhiibay ka soo baxay ama wax ku soo kordhiyay. Taasina wax annaga uun nagu keli ah ma ahayn ee adduunka haddii aad eegto, da'aadda lagu hanoqaado ee dowlad ama bulsho loogu shaqeeyaa waa taas aanu annagu ku hawlgalnay idinkana waxa weyn idiin ah maanta.
Midda kale ee aan ku sheegi karo in hibadii, hal-abuurkii iyo aragtadii siyaasadda noo saamaxayday in aanu ka lib keenno ayaa ahayd in ay jirtay dowlad naga kafaalo-qaadday baahiyihii shakhsi ee guri lahayd, caafimaad lahayd, waxbarasho lahayd, ee masaariifta iyo bariiska lahayd! Markii tebiddaas nalaga kafaalo-qaadayna waxaanu xoog iyo fikir ku bixinay hawlihii aanu kolkaas haynay.
Waana taas midda keeni karta maanta in idinka iyo annagu aanu ku kala duwannaano saamaynta nololeed ee u dhexeysa da'da. Oo hadda bal u fiirsada oo eega, qof wal oo hibo cusub iyo aragti cusub la yimaaddaa marka uu muddo yar wado, waxaa hor istaaga oo uu la daalaa-dhacaa bariiska iyo biilka xaafaddiisa. Kolkaas buu ka mashquulayaa arrin bulsho iyo mid hal-abuur una xuubsiibanayaa sidii uu u dhacsan lahaa biil iyo bariis oo keliya!..."
Annagu dhabanka iyo gacanta ayaanu isku haynaa intaas. Maankayaguna hadba duni kale iyo aragti naga durugsan ayuu kolba dhex heehaabayey. Wax kasta oo uu noogu hoga-tusaaleeyona hii-hi iyo haaheey buu afkayagii ku juuqgabay. Weydiintaas se waxaanu u helnay warcelin la yaab nagu ahayd oo run biyo-kama-dhibcaan ah ahayd. Alla maxaa dad bulshada iyo ummadda waxtari lahaa uu hoos u dhigay oo ku dhex lumay bariis-dhacsi iyo biil raadin!
Wax badan baanu ka faa'idnay adeer Siciid Jaamac Xuseen, Alle haw raxmado e. Wixii aan awoodo hadba waan idinla wadaagi ee halkaas aynu ku daysanno caawa.
WQ, Cabdicasiis Ibraahin Ciise (Daacad)
Cabdicasiis Qalin-Dhuux
Kommentarer
Skicka en kommentar