Caweys Xusuus Mudnaa! Kulankii Maxamed I Warsame (Hadraawi) iyo Bulshada Reer Stockholm 02 Juun 2015

Inkastoo aan dhawr jeer oo hore la kulmay abwaanka, caanka ah Maxamed I Warsame (Hadraawi) haddana caweyskii dorraad ee taariikhdu ahayd 02 Juun 2015, maalintii salaasada, xusuus gaar ah bay ii ahayd. Waan hubaa in ay in badan oo reer Stockholmna u ahayd. Hawshan oo ay soo abaabuleen hoggaanka Jaaliyadda Somaliland ee Stockholm, waxa ay ku beegnayd maalin shaqo, balse hawshii ay geliyeen Jaaliyad ahaan iyo dareenkii shacbiga reer Stockholm oo maqalka magaca Hadraawi, u dhegtaagay, waxa la soo buuxiyey golaha shacbiga ee xaafadda Rinkeby, ee magaalada Stockholm. Xilligii loogu talo-galay in la yimaaddo, waaba laga soo horreeyey. Waxa ay ahayd in barnaamijka la furo 18:00 laakiin waxaaba la sii joogay 17:00.

Markii uu soo galay abwaan Hadraawi ayaa salaan iyo sacab la-la kacay oo wejiyo faraxsan niyadsami lagu qaabilay. Habsami u socodkii barnaamijka ayaa la guda galay, judhiiba Maxamed Xaaji Ismaaciil ayaa ku furay aayaadka Qur'aanka Kariimka ah, ka dibna guddoomiyaha Jaaliyadda Stocholm Md: Xuseen Abaaddir ayaa ku soo dhoweeyey dadweynaha eraygii ku habboonaa. Waxyar ka dibna waxa la wareegay Maxamed Xirsi Guuleed oo xubin ka ah Ururka Qoraayasha Somaliland laanta Iswidhan, oo iyagu soo diyaariyey maansadii abwaanka, una kala qaybsaday Afar Qaybood oo kala ahaa Q-ta Jacayla, Q-ta Bulshada, Q-ta Sooyaalkii Abwaanka iyo Q-ta maansadii dagaalka. Afartaas oo ay soo kala jeediyeen Maxamed Xirsi, Yuusuf Xaaji Cabdillaahi Xasan, Muuse Maxamuud Ciise (Dalmar)iyo aniga oo Q-ta maansadii dagaalka waxyar ka taataabtay.

Ujeedada ugu muhiimsani waxa ay ahayd in reer Stockholm la kulmaan abwaanka, balse aan la saarin culays ah in uu abwaanku noo mariyo maansooyinkiisii qiimaha lahaa. Balse, mar haddii la wada hayo oo qoraal iyo maqalba laga dheregsanyahay la is xasuusiyo, meelo ka mid ah maansadiisii. Waxa ka mid ahaa meelaha aad loo jeclaystay qaybo ka mid ah maansadii GOLJANNO. Maxamed Xirsi Guuleed ayaa sharraxaad ka bixiyey qaybahan hoosta ku qoran, aad baana looga helay.

Waxa la yidhi duq guunoo

Golxoshoo idlaadoo

Lafta dheeri godatoo

Gaabshey oo cuslaadaa

Guudadley ku soo baxay

Mayracaysa galab adhi.

Gooli baadhka sheekada

Haasaawe goo goo

Hadalkii gar adag iyo

Gendel iyo alool saar

Hadba garagar oodee

Hadba gooddi kala bixi

Galka ulo ku baadh baadh

Goobyaalka inantii

Garan weydey baanuhu

Geesuu u dhacayoo

Waxay tidhi geddaa hadal

Aan is guursannuu yidhi

Alla yay gujay tidhi

Kol hadduu gedmado hadal

Goobta waan ka dheelmaa

Ayay gololadii tidhi”

Wuxuu yidhi god bay hadhay

Waxay tidhi Gadh Cawsow

Adhigaa galbanayee

Aan gadaal u soo rogo”

Isna yidhi ka gaadhsii

Guusha maanta kuu dagan

God-dalooladiisiyo

Guga faraqa haystiyo

Gedihiisa qari yidhi

Ganbaraashka sii luud

Gumar buu ka jaray qodax

Geed kaluu ku soo mudey

Gabbashada ku soo noqoy

Ku soo laabey goobtii

Gabadhiina ugu timi.

Gol castii dhacaysuu

Go’a sare hagoogtiyo

Gacantiisa ka hadhsaday

Wuxu yidhi “galoolkaas

Maxaa gaari dumareey

Gunta hoose kaga mudan?

Ma gammuun ku jabay baa?

Ma fallaadh ku ganan baa?

Ma gafuudh maxaadh baa?

Ma atoor gadoodaa

Geesihii mid kaga tegey?

Geedka wey u jeedaa

Waxa gaar u raacee

Guur-doonku sheegee

Gunta hoose kaga mudan

Indhaheedu gabadhii

Markay gaadhi waayeen

Waxay tidhi inoo gee

Runta aynu gunudnee.

Fadalkaa la wada gurey

Garo oo barbaarkii

Gebgebtiyo is waalkii

Wuxuu guudka kaga dhacay

Hal fadhida gelgelin

Sow ka sokaysa geedkii

Qosol guuli keentay

Hayn weydey gabadhii

Isaguna gilgilashada

Gebi dhaca is yidhi toos

Misna gudub u soo ciir

Gabaxdii is qaban waa

Gadhka ciidda kula duul

Show illayn gardaadkiyo

Garab iyo shanshaa jaban

Jaljalleecday gegiduu

Ku burburay geyaankeed

Laye Guud-haldhaaley

Garangarisay laafyaha

Isna gocasho sii dhawr

Baalal goof ku yaalliyo

Indha gudhay ka daba tuur

Dabadeed galgalashada

La gurguurey boodhkii

Gawdiidsey meeshuu

Salka dhigey go’doonkii

Ku wadh wadhay gabaahiir

Waxa hodey garaaraha

Golxadiyo cabaadhyaha

Goobtaasi hadal ma leh

Goolkaasi dhalan waa

Guurkaasi beenow

Gabow baa da’ mehersaday

Maxamed Ibraahin Warsame waxa uu innaga mudanyahay sharaf iyo duco. Waxa uu maalmahan ku sugnaa Stockholm. Kulankaa caweyska ahaa si gaar ah ayuu xusuustayda ugu beermay. Waxa aan xusuustay markii iigu horreysay ee aan arko Hadraawi. Waxa aan malaynayaa in ay ahayd 1980kii, beryahaa oo uu ka yimi Xamar, oo Berbera soo maray kuna socday Burco ayaan ku arkay magaalada Sheekh. Gaadhi yar oo malaa Karaasiido ah ayuu la socday. Dareenka dadku beryahaa wuu kacsanaa, maqalka magaca Hadraawi na waxa uu ahaa si goonniya. Waxa laga joogaa xilligaas aan dareenkaa xusuustay 35 sannadood. In aan maanta anigoo dhinaciisa fadhiya mariyo maansadii dibedyaal waxa ay ii ahayd xusuu isku xidhaysaa maalintaas aan arkay iyo dorraato oo salaasa ahayd taariikhduna ahayd 02 Juun 2015. Ilaahay cimri iyo caafimaad baan uga beryey, aamiin. Maansadiisu waxa ay i bartaa waxbadan. Waan dhadhansadaa, dareemaa, sawirrada, hummaagyada midabada, xilliyada kala rogan baan kolba mid dhex mushaaxaa.

Uma haystoin uu Hadraawi yahay maansayahan keliya, oo erayo uun isku xidhiidhiya, ee waa Faylasoofi, ildheer, oo han iyo hal-adayg leh. Maansadiisa waxa laga qori karaa buugaag farabadan. Gu'gii 2004 tii oo aan kula kulmay magaaladan Stockholm ayaan weydiiyey in aan maansadiisa ku qori karo buug aan waday, qaybo ka mid ah. Waxa uu iigu jawaabay, gebigeedaba qoro, anigu wax lacag ah kama rabo, cid kasta oo sii qoraysana waan u oggolahay.

Waxa aan caweyskaa kula kulmay Sharmaarke A. Muxummad oo ah xoghaya madaxtooyada Somaliland. Runtii waxa aan odhan karaa waxa uu u qalmaa in uu ummad dhan hoggaamiyo, kama hordhacayo, balse inta aan hadalkii uu goobta ka jeediyey ka dhadhamiyey waa codkar han sare leh. Sharmaarke waxa uu la socday Abwaan Hadraawi oo ay dalkii iska soo raaceen ilaa Jarmalkana wada socdeen dhawaanna ay ku wada noqon doonaan Somaliland. Ugu danbayn, waxa mahad weyn lahaa dadkii madasha soo cammiray, waxa aan kaloo si gaar ah ugu mahadnaqayaa Jaaliyadda Somaliland ee Stockholm oo uu hoggaaminayo Xuseen Abaaddir iyo dhammaan guddida Jaaliyadda. Xubnihii ururka Qorayaasha Somaliland iyo guud ahaanba bulshada soomaaliyeed ee reer Stockholm.

Nabad iyo Caano

Sayid-Axmed M Yuusuf (Dhegey) 

Iswidhan/04 Juun 2015 maalin khamiis ah