Barnaamijkii Maaweelada iyo Garaadkorinta Carruurta ee Xaafadda Skärholmen 30-04-2016 sabti

Shalay oo ay taariikhdu ahayd 30 bisha May, sannadkan 2016, waxa xaafadda Skärholmen ee magaalada Stockholm ka dhacay barnaamij carruureed aad u xiiso badan. Barnaamijkan oo isugu jiray madadaalo, garaadkorin, ciyaarodhaqameed iyo tartanno kala duwan ayaa waxa soo diyaariyay ururka waalidiinta xaafadda Skärholmen (Somaliska föräldrar Forum i Skärholmen) iyo ururka dhaqanka ee Somali Nordic Culture.





Waxa uu barnaamijku si rasmi ah u bilaabmay markii ay saacaddu ahayd 13:00 duhurnimo. Goobta ayay xilli horeba soo camireen carruur iyo waalidiin u heelan in ay ubadkooda wakhti fiican la qaataan. Martida barnaamijka ee maalintan carruurta wakhtigooda la qaadanaysay ayaa kala ahaa; Abyan Cali oo ah qoraayad buugaagta carruurta ku qorta afafka Soomaaliga,

Iswiidhishka iyo Ingiriisiga. Abyan oo ah gabadh Soomaaliyad ah, oo ku dhalatay dalka Kiiniya, wakhtigeeda intiisii badnaydna ku noolayd Iswiidhan ayaa ah qoraayad u taagan sidii ay ubadka Soomaalidu u heli lahaayeen buugaag tayo leh oo ay akhristaan. Dhanka kale waxa isna barnaamijka qayb ka ahaa Oscar Trimbel oo ah qoraa iyo farshaxaniiste reer Iswiidhan ah.

Oscar waxa uu badi sheekooyin carruureedkii Soomaalida isugu geeyay buuggiisa uu ugu magacdaray Sheekooyinxariirooyinkii Saxaaraha, buuggaasi oo uu ku qoray afafka Iswiidhishka iyo Soomaaligaba. Waxaanu dhawr iyo siddeetamaadkii degganaa Soomaaliya, taasi oo u sahlaysa in uu wax ka oggaado dhaqanka iyo suugaanta Soomaalida. Waxa sidoo kale carruurtii gabayo xiiso badan oo afka Iswiidhishka ku qoran u akhriday Muuna Munasar.

Muuna waa gabadh aad u da’ yar oo 17 jir ah, waxaanay bishii hore ee Maarso ku guulaysatay abaalmarin dhanka carrinta suugaanta ah oo sannadkiiba mar loo qabto dhallinyarada ku dhaqan magaalada Stockholm. Sidoo kale, Muuse Maxamuud Ciise (Dalmar), ayaa isna madasha ku soo bandhigay magaasiin carruureedka cusub ee Carruurteenna. Muuse waxa uu dhanka kale carruurta u akhriyay sheekooyin ay aad ula dhaceen.

Qaybtii danbe ee ciyaarta ayaa isugu jirtay tartan ay carruurtu ku helayeen buugaag hadiyado ah iyo waliba ciyaaro dhaqameed ay carruurtu aad ula dhaceen. Muuse Dalmar iyo Abyan Cali ayaa carruurtii ciyaarsiiyay ciyaaraha kala ah Dhaantada iyo Heelada. Waxa xusid mudan sidii quruxda badnayd ee ay ubadku uga mabsuudeen una ciyaarayeen ciyaarahani. Sida ay isu ruxayeen, u boodayeen, sacabkana isula helayeen baa la moodayay in ay waligoodba carruurtani soo ciyaari jirtay ciyaardhaqameedyadan. Tani waxa ay muujinaysaa baahida weyn ee ay ubadkeennu u qabaan barashada ciyaaraha dhaqanka, kuwaasi oo maskax ahaan iyo jidh ahaanba waxtar weyn u yeelan kara.

Barnaamij kan dhiggiisa ah oo loogu talogalay dadka waaweyn ayaa isna 14 bisha May ka dhici doona guriga ummadda ee xaafadda Rinkeby (Rinkeby Folkets Hus). Barnaamij suugaaneedkan oo uu soo qaban qaabiyay ururka Somali Nordic Culture ayaa noqon doona mid xiiso leh, waxaana barnaamijka ka soo qaybgali doona qorayaal, suugaanyahanno, cilmibaadhayaal ku hawlan afka iyo dhaqanka Soomaalida oo isugu jira Soomaali iyo Iswiidhish iyo waliba dhaqan-aqoon madasha ku soo bandhigi doona suugaan xiiso leh. Saacadda uu barnaamijkani dhici doonaa waa 15:00 galabnimo.

Ugu danbayntii haddii aannu nahay ururka waalidiinta xaafadda Skärholmen iyo ururka dhaqanka ee Somali Nordic Culture, waxa aannu u mahadcelinaynaa dhammaan dadkii ka soo qaybgalay barnaamij iyo gaar ahaan intii gacanta weyn ka gaysatay in uu barnaamijku si wanaagsan u dhaco. Ballankeennu waa ka shaqaynta danta guud ee bulshada iyo iskaashi walaalnimo oo toosin iyo tilmaan ku dhisan.

Ururka waalidiinta Soomaalida ee xaafadda Skärholmen

https://www.facebook.com/groups/686809601424170/
Iyo Somali Nordic Culture
www. Somalinordicculture.cm