Waxay ahayd xilli aad loo hadalhayey dagaaladii buuralayda Sheekh ee dhexmaray ciidankii xukuumaddii Maxamed S Barre iyo ciidankii SNM oo markaa uu hoggaaminayey Ibraahin Cabdillaahi Xuseen (Dhegaweyne) 1984kii.
Dagaalkaa oo Dawladdii markaa jirtay ku noqday halxidhaale aan la furfuri karin ayaa meelkasta laga hadal hayey. Inkastoo dad badani aanay ka warqabin wixii dalka ka dhacayey oo is gaadhsiintu aad u liidatay ama aan la oggolaynba in arrimahaas laga hadlo, ayaa waxa dhacday arrin meelkasta laga maqlay oo aan la qarin karin.
Waxa la afduubay dayuuraddii Somali Airline, oo sidaan filayo ahayd mid ka mid ah labadii Dayuuradood ee waaweynaa ee dalkuba lahaa. Waxa aan joogay Muqdisho, waxaan maqlay goor fiid ah. Warkii TV-ga waa laga sheegay, waayo wax la qarin karo ma ay ahayn. Kabtanka Afduubay oo ahaa Cawil Cadami IHN waxa uu ka tirsanaa ciidanka Asluubta. Waxaana ku weheliyey Baashe iyo Axmed Waraabe. Haddaba afduubkaasi saamayn weyn ayuu ku yeeshay dad badan. Waxaana ugu saamayn badnaa dadkii socdaalka ku jiray ama ku qornaa Dayuuradda.
Waxa aan xasuustay, IHN Aabbahay, Maxamed Yuusuf Dhegey dhibaatadii ka soo gaadhay, afduubka iyo dagaaladii Buuralayda Sheekh. Fasax ayuu ku yimi dalka, kana yimi Imaaraadka Carabta/Abudabay oo uu muddo dheer ka shaqaynayey. Markii Buuraha la soo galay waxa uu joogay magaalada Sheekh, oo ahayd goobtii qoyska reer Maxamed deggenaa. Markii dagaalkii SNM iyo Ciidankii Dawladdu ku kala hagaageen, oo uu dagaalkii dhammaaday, ayaa sidii caadada u ahayd xukuumaddii Siyaad Barre, la soo qabqabtay dadkii shicibka ahaa. Waxaana dil lagu xukumay 25 qof (24 rag ah iyo haweenay keliya). Waxa ku jira Sheekh la odian jiray Cabdiraxmaan M Cali IHN dhammaantoodba, waxa la weydiiyey dilkooda wax yar ka hor inay maxkamadda wax ka codsanayaan. Wuxuuna Sh. Cabdiraxmaan yidhi, gabadha ka fura xadhigga.
Maxkamaddaasi waxay ka dhacday geed hoostii, waxaana go'aankii maxkamaddu ahaa DIL IYO IN IMMINKA LA FULIYO. Maydkoodiina waxa lagaga tegey goobtii lagu dilay oo ahayd halka laga galo Buurta Sheekh. Haddaba Aabbo waxa uu ka mid ahaa dadkii la soo xidhxidhay, wuxuuna la xidhnaa rag ay ka mid ahaayeen Sh. Cabdiraxmaan M Cali oo ah Sheekha la dilay. Aabbo waa laga soo daayey, waxaana la soo gaadhay xilligii uu ku noqon lahaa shaqadiisii yo Abudabay, laakiin muxuu raaci? Dayuuraddiiba waa la afduubay. Mana tegi karo Berbera, fasax la'aan. Waxay noqotay inuu helo warqaddii oggolaanshaha dhaqdhaqaaqa oo aan halkan ku soo lifaaqay. Waa Xusuus in wax laga barto ayuun baa muhiim ah. Qaladka si yar u dhaca, waxa uu keenaa qaladaad waaweyn oo aan laga dabbaalan karin.
Ilaahay ha u naxariisto dhammaan intaa aan qoraalka ku soo qaatay, ramin, aamiin
Sayid-Axmed Dhegey
25/11/2018 Sweden
Kommentarer
Skicka en kommentar