Sheeko aan ka soo gaadhay ayeeyo, Alle ha u naxariistee, ayaa sidan odhan jirtey: Sagaarku, waa atoorka e, waxa had iyo jeer ku lammaan yac, waa sakaaro e. Orgacu na isaga ayaa u qaylo badan waxaraha, xitaa haddaanu qaloonbiyeyn. Had iyo jeer na waxa la maqlaa “dundumadii reerka dushiisa, maanta halaq baa ku laayay waxaro.” Kolkay dundumada hadhsanayaan waxaruhu, waxa la yidhi, waxa ay qoobka hore galiyaan godka ay ku arkaan dundumada agteeda, saa halaq baa inta badan ku jira e, wuu qaniinaa. Neefku wuu dhintaa markiiba. Kama waantoobaan waxaruhu, oo inta ay bif yidhaahdaan, ayay ku noqdaan mar kale isaga oo waxarkii hore maydkiisu wali dul yaallo godka. Way ku le’daan.
Weli lama arag sakaaro lammaan oo midkood ku hodmay god halaq ku jiro, haddana intaa banka aan geed sare lahayn, sakaaradu way hadh gashaa godadka dundumooyinka ka ag qodan. Waxa la yidhaahdaa atoorku wuu ka il dheeryahay orgiga, oo kuma hodmo godka halaqu dhex jiifo.
Saaka anigoo oo baraynaya maansada “Hoodaar” ee uu tiriyey Faarax Axmed Cali “Gamuute” ayaa waxa iga soo hor baxay boggan.
Dundumo halabtii u taal halaq,
Hanqaarana dulin ku huursaday,
Sagaar war hayaan huluulane.
Say naftu i tidhi, waa sheekadii ayeeyo oo maanso ku sheeggan. Waxaan dhadhansadaa maanso ku sheekaynta, iyo xeeldheerida Faarax Gamuute. Saa waxaan dareemay fiirada bulsho in badhkeed huruddo, oo godkii mar laga qaniinay ku noqnoqoto, badhkeedna ay soo jeedaan, oo sidaa u kala feejigan yihiin.
Jaamac Muuse Jaamac,
Landhan, 1 Noofember 2018
Kommentarer
Skicka en kommentar