Maalmaha is daba socsda ee sunsumaya, waxa ay ku sii siqayaan gabaw iyo geeri. Qofka banii'aadamka ahi waxa uu noolyahay waa maalmo kooban. Waxaase lagu kala duwanyahay, ka tegidda raad xusuuseed oo wanaagsan iyo mid ku liddi ah. Qofku inta uu noolyahay, waxa uu bulshadiisa ku soo kordhin karaa wax farabadan, wuxuuna u dhimi karaa intaa in le'eg. Ilaahay baa mahadleh, igu soo simay 24 sannaddood ka dib in loo debbaaldego maalintii la go'aansaday in Somaliland ay gaar uga taagan tahay isku darkii lixdankii ay la midawday Somaliya. Bayd ka mid ahaa maansadii DIRSOOC ee Ibraahin Aw-Saleebaan (Gadhle) ayaa ahaa " Waar hooy! dadkaygoow dawladnimadaad diiqada u bixiseen, degdegsiinyo mooyee doqonniimo ma ahayn.
Dabcan isku darkii lixdankii ma ahayn wax laga naxo, balse barwaaqo mooyee, lama filayn in wixii dhacay ay dhici karaan, oo suurtogal ka noqon karaan dad soomaaliyeed gudahooda. Waaya-aragnimo la'aan badan baa jirtay, oo maanta aqoonteeda iyo waayaheedaba la sii saadaalin karo.
Xusuustayda iyo Martiqaadkii reer Finland aan ku soo koobo qoraalkayga. Waa marka koowaade, aan u mahadnaqo dhammaan reer Finland. Waxa ay si sharaf leh iigu martiqaadeen carriga Finland gaar ahaan Helsinki si aan ugala qaybgalo debbaaldegga 18 May, oo ay ku beegeen maalintii sabtida ee 15 kii Mey. Waxa aan u diyaargaroobay sidii aan u tegi lahaa Finland, laakiin waxa farxad kale ii ahayd in aan reer Stockholm-na kala sii qaybgalo maalintii Jimcaha oo ay jaaliyadda Somaliland ee Stockholm iyo Ururka Qorayaasha Somaliland si wada jir ah ugu qabteen, debbaaldegga xaafadda Tensta. Waxa xusid mudan in aan tilmaamo, ka soo qaybgalkii wasiirka deegaanka Shugri Xaaji Baandare iyo Wakiilka Somaliland ee Iswidhan Rooda. Isla habeenkii Jimcaha ee sabtidu soo gelaysay ayaan u duulay Finland.
Waxa iga horyimi Axmed Hurre oo ah guddoomiyaha Ururka dhallinyarada Somaliland ee Finland wuxuuna i geeyey goobtii aan u hoyan lahaa. Goor ay ku beegnayd goorsheegtu 12:00 duhurnimo ee maalintii danbe ee sabtida ahayd, ayey iigu yimaaddeen hudheelkii aan degennaa Axmed Hurre iyo Maxamed Axmed oo labaduba ka mid ah hoggaanka ururka dhalinyarada ahaana ururka igu soo casuumay in aan imaaddo Finland. Goobtii xafladda ayaanu tagnay, oo markiiba la soo buuxdhaafiyey, si fiicanna loo soo cammiray. Hadallo isugu jiray tusaale iyo gubaabo ayaa goobta laga jeediyey. Qaybtii aan anigu kulahaa oo ahayd dhanka taariikhda ayaan, la wadaagay ka soo qaybgalayaashii. Waxa kaloo aan la wadaagay buugaag kala ahaa Sooyaalka Somaliland, Socdaalkii Dheeraa iyo Milicsiga dagaalkii 1988kii.
Waxa xafladda ka hadlay dad badan, waxa aan se ka xusi, Maayer-xigeenka Burco Maxamed Xasan Jaamac iyo Maareeyaha wakaaladda biyaha ee Burco, Ibraahin Yuusuf Diiriye oo safar ku joogay Finland. Qoraal dheer iigama baahna mahadnaqa aan u mahadcelinayo reer Finland guud ahaan, gaar ahaan ururka SOLAY oo ay ku midoobeen dhallinyarada reer Somaliland. Ka sii gaar ah Gud, Axmed Hurre iyo Axmed Maxamed oo si fiican iigu soo dhoweeyey Helsinki. Waxa isaguna sagootintii iyo ka soo noqoshadii Finland, si wanaagsan uga qaybgalay Xildhibaan Faysal, oo ilaa madaarka ila socday. Dhammaantiinba mahadsanidin. Odayaashii kale ee aan kula kulmay debbaaldegga, iyagana salaan baan u dirayaa sida Siciid Cumar, Axmed Caymis, Cabdi Cabdillaahi iyo Cumar Cabdi Nuux... .....
Nabad iyo Caano
Sayid-Axmed M. Yuusuf
Kommentarer
Skicka en kommentar