Ururka Qorayaasha Somaliland ee Iswidhan oo Hadhimo-sharafeed ku Qaabilay Duqa Magaalada Hargeysa oo ku sugan Isidhan.

Maalmahan waxa ku sugnaa carriga Iswidhan duqa caasimadda Somaliland Cabdiraxmaan Maxamuud Caydiid (Solteco). Haddaba, maanta oo ay taariikhdu tahay 20-12-2015, maalin Axad ah ayuu Ururka Qorayaasha Somaliland u sameeyeen Hadhimo ay ku qaabileen duqa caasimadda Somaliland ee Hargeysa. Bilawgiiba waxa sharraxaad guud ka siiyey UQS aasaaskiisii iyo ilaa maanta halka uu marayo guddoomiyaha ururka Sayid-Axmed M. Yuusuf. Waxa uu guddoomiyuhu sheegay in ururka la sameeyey 2003 dii, xilligaas oo baahida koowaad ahayd isku xidhka iyo iska warhaynta qorayaasha. 

Ku talo-galladii ugu horreeyey ee Ururku waxa uu ahaa in buug laga qoro Caasimadda Somaliland, si loo helo buug koobaya taariikhda magaalada Hargeysa. Qorshahaasi ma uu qabsoomin, waxaana la dareemay in loo baahanyahay in ururku ka dhisnaado gudaha dalka. Taasoo toban sannadood dabadeed laga hirgeliyey xaruntii guud ee ururka in ay ahaato Hargeysa 2013.

Maxamed Xirsi Guuleed oo ka mid ahaa aasaasayaashii ururka ayaa isaguna talo iyo waano guudba u soo jeediyey duqa magaalada Hargeysa Cabdiraxmaan Maxamuud Caydiid (Solteco). Waxa ka mid ahaa talooyinkii Maxamed, in dawladda hoose ay ilaaliso magacyada loo bixinayo meheradaha oo aan magackasta lala bixin. Tusaalaha uu bixiyey Maxamed waxa uu ahaa, in Dastuurka dalka ay ku qorantahay afka koobaad in uu yahay afsoomaali, kan labaadna af-carabi. Sidaa awgeed wax kastaba lagu qoro afsoomaali, haddii la labaynaya af-carabi, haddii af saddexaad lagu soo qorayo, waa halkeeda ayuu Maxamed ku soo gunaanaday hadalkiisii qiimaha lahaa.

Nuux Ismaaciil Maxamed oo isaguna ka mid ahaa aasaasayaashii ururka, ahaana ninkii magaca u bixiyey ururka ayaa isna talooyin halkaa ka soo jeediyey. Waxaana ugu mudnaa laba talo oo kala ahaa: 1. in Diiwaan habaysan loo sameeyo Dawladda hoose ee Hargeysa 2. in Maktabad u gaar ah dawladda hoose loo sameeyo. Labadaa qodob ayaa talo ahaan UQS ku sii adkeeyeen Duqa Hargeysa, Cabdiraxmaan Maxamuud Caydiid (Solteco).




Waxa kulankaas goobjoog ka ahaa Xuseen yare iyo Dr: Maxamed Yuusuf. Ugu danbayntii waxa hadalkii la wareegay duqa Hargeysa oo ka mahad-celiyey kulanka uu UQS ku qaabilay. Waxa uu sheegay in ay arrimahaas oo dhammi yihiin muhiim, oo uu qaatay talo ahaan. Dhinaca maktabada waxa uu tibaaxay in ay bilaabeen in xaafad kasta laga fuliyo maktabad, taasoo hawsheedu weli socoto. Buugaagta iyo dhiirri-gelintooda, waxa uu yidhi waa aanu ka qayb qaadannay dhawr buug oo aanu gacan dhaqaale ka geysannay ayaan jira. 

Kulanaasi waxa uu ku dhammaaday si fiican oo talo iyo tusaaleba lahaa. Si wanaagsan oo isdhegeysi iyo warcelin habboon. Waxa uu ku dhammaaday guddoonsiin la guddoonsiiyey buugaag dhawr ah duqa Hargeysa.