Buug carruureed: "BISADDII ANBATAY"

Buugaagta carruurta soomaalida loogu talo galay waa ay yaryihiin, meelaha qaarna maba jiraan. Inta badan ee laga qoray sheekooyin-ka carruurta, waxa ay u badan yihiin kuwo aan fahamka ilmaha yar ee ku koray magaalo ama aan dalkiiba joogin ku adag. Waxa ay ahayd in si hufan oo aad looga shaqeeyey loogu soo gudbiyo carruurta, buugaag ay fahmi karaan. Sheekooyinka carruurta aadka u da'da yar waa la allifi karaa, iyadoo kolba wax loo tilmaamayo ilmaha yar si uu u fahmo.

Akhriska waalidka ayaa muhiim ah oo in aabbo ama hooyo uga sheekayso sheeko, waxa u sii fududaynaya haddii ay jiraan buugaag ku qoran afsoomaali. Waxa aan in badan arkay buugaag la soo tarjumay, oo afsoomaali loo hal-tebiyey, oo dhaqan iyo diin midna wax fiican aanuu ka korodh-sanayn ilmaha Soomaaliyeed. Muddo dheer ayaan ku fikiri jiray in aan buugaagta carruurta qoro, waana buuggii ugu horreeyey ee jaadkan ah ee aan qoro. Waxa aan ku talo jiraa haddii Ilaahay idmo, in aan buugaag carruurta aadka u da'da yar soo saaro dhawaan. Kuna dhiirri-geliyo inta jecel qoraalku in ay ugu yaraan hal buug u soo saaraan ubadka da'da yar oo ah jiilka berri.

Buuggan la magac baxay Bisaddii Anbatay, waxa uu dhammaystirmay bishii Ramadaan ee gu'ga 2014. Waxa aan aad ugu mahadnaqayaa, Bahja M Ducaale, oo gacan weyn ka geysatay sawirrada ku jira  buugga. Waxa kale oo aan halkan uga mahadnaqayaa dhiirrigelintii Muuse M Ciise Dalmar, oo ilaa kal hore kolba i xasuusinayey, sidii aan mar uun buug carruurta ah u soo saari lahaa.  Buugaagta carruurta waxa muhiim ah sawirrada, sidaa awgeed waa in aynu aad u dhiirri gelinnaa inta ku fiican sawirrada gacanta. Si qoraaga iyo farshaxanku isula jaan-qaadaan.

Waxa uu ka kooban yahay 24 bog, oo bog kastaba uu sawir ku jiro. Buuggan waxa aad ka dalban kartaa, mareegta hoos ku xusan:

https://www.bod.se/index.php?id=3543&objk_id=1293267

www.Bod.se

gacanlibaax2001@yahoo.se

Sayid-Axmed M. Yuusuf (Dhegey)

Stockholm/Iswidhan---11-07-2014, isniin