Sidu waa sidii
kal hore iyo saa’id. Waa xagaaga xagaagiisii, bil ogos bisheedii iyo isla
barxaddii guriga shaqaalaha ee Hargeysa; waa na jimce barkhadle. Xalay saqbadhkii
mayay baa magaalada miray. Hillaaca walalacdiisa cid hawli soo jeedisay baa
daawanaysay. Sanqadha onkodku se dadka hurdada fudud wuu toosinayey. Hakad ha
lahaado roobku, se inta ay dhibcihiisu xidhiidhsanaayeen baa badnayn. Dhibcihii roobka ee xalay ku laba dhacayey baa dhulka radiyey. Cadceedda
subaxeed haddii ay u gurman lahayd, iyana daruuraa daboolay. Sidaas darteEd baa
dhulka xareedda wasakhowday meel walba u wadhnayd.
Saaka(08/08/2014)
kolkii uu waagu baryey baan soo dhaqaajiyey. Qummaati baan foolka u saaray
xarunta bandhiggu ka furmayey. Suuqa badhtamaha magaalada ayaan soo dhex maray.
Jimcaha dartii meherado badani ma ay furnayn; haddii ay furnaan lahaayeenna
kollay dan kama aan lahayn. Degdeg baan ku soo gaadhay goobtii carwada. Misana waa boqollaal dhallinyaro
iyo waayeel, soomaali iyo ajaanib oo rag iyo dumar ba isugu jira. Kuwo badani
garammo cadcad iyo koofiyado ayey ku jookhnaayeen. Waa kuwii carwada ka
qaybgalayey, kuwii buugta badhnigayey, kuwii martida qaabilayey iyo kuwii
goobta ka shaqaynayey. Se intaas oo dhan hal baa iiga dareen duwanaa, boqollaalka buug ee bannaanka hore ee xarunta
wadhnaa baan u riyaaqay. Halka ugu buuqa badani ugu horrayn halkaas bay ahayd.
Hoolka waynee kulanku ka furmayey kolkii dambe ayaa la isku shubay. Buugta
meesha tuulnayd cid daawata, cid iibsata iyo cid taagnida ku akhrida ba waa lagu
wada foognaa.
Hal-abuurradii
gaasa baxay iyo goobtu waxa ay kulmisay boqollaal dhallinyaro ah. Maxamed
Ibraahin Warsame (Hadraawi), Macallin Siciid Saalax Axmed, Axmed Saleebaan Bidde,
Rashiid Sheekh Cabdillaahi (Gadhwayne), Nuuradiin Faarax, Sheekh Maxamuud
Dalmar, Siciid Jaamac Xuseen iyo kuwo kale oo badan baa carwada ku sugnaa. Waxa goobtu jaanis isu siisay
hal-doorka iyo bulshada oo ay yartahay
in ay waqti sidan u furan isu helaan. Xaflado aan badnayn oo aanay isugu
dhammayn baa
marar lagu kulmaa. Tani se wax ay suurogalisay intaas iyo in kale oo aanan
xusin ba in ay goobta ku sugnaayeen. Guusha ugu ballaadhan ee carwadu in ay
taas tahay baan aaminsanahay. Haddii mid kale aan ku dari lahaana waxa ay noqon
lahayd isku xidhka dhallinyarada dalka gobol walba ka socday, ee goobta isugu
yimid iyo hantida waraaqaha ku duugan ee tuullayd. Waa taas guusha iyo guuluhu!
Waa dareenka la isugu yimid iyo dadka isu yimid. Midhahaas, iyo kuwo qof ba gaar u ah, baa ahaa
kuwa dadka ilkahooda kor uga faydayey dibnahooda ee dhoollahooda muujinayey.
Carwadu Soomaali
iyo wax soo saarkeed uun kuma ay koobnayn. Ajaanib qoraayo iyo sawirayaal ah
baa joogay. Ururka Qoraayada Malawi baa martida ku jiray. Nigeria, Uganda iyo
Kenya na waxa ka socday qoraayo buugtooda carwada ku soo bandhigi raba. Kuwo
kale oo caddaan iyo madow ba lahaa baa iyana joogay. Qaarkood oo aan la
sheekaystay waxa ay la yaabbanaayeen in Hargeysa carwo noocan ahi ka qabsoonto.
Waxa se ay moogganaayeen in Hargeysi hore ba u ahayd
hoyga fanka soomaalida. Taas markii aan ku baraarujiyey
tartiib tartiib bay maskaxdoodu u liqday suuragalnimada bandhigga sidan u
ballaadhan.
Tan kale ee
wacnaanta badan baa ahayd; in tobannaan dhallinyaro ahi buugaag cusub carwada
keeneen. Hablo iyo wiilal ba waa ay wada joogeen. Badankoodu duruufta ay la soo
mareen baa laga warqabaa. Duco iyo dhiirrigalin, haddii wax kale la tari waayo,
iyo buugaagta oo laga iibsadaa hiil bay u tahay iyo horumar. Tobannaan kale kashooda
haddii jeexi lahaa, markii ay goobta saaka yimaaddeen baa hindisahaasi ku
dhashay. Tobannaan kale oo naadiyo akhris mataleyey baa iyana buugaagta
bandhigyey. Duni caynkan ahi in ay dhulkeenna ka jiri karto, dadkeennu samaysan
karaan iyo in ay sidan u hirgali karto ayeynu markhaati isugu noqonnay.
Intaas oo dareen
farxadeed leh, haddana warwar baa ku lammaan. Dad badan baan dhaaddanayn
waxtarka hawsha caynkan ah. In Hargeysa lagu qabto carwada labaad ama saddexaad
ee ugu wayn ee buugaag lagu badhigo ee geeska Afrika, runtii waa guul hor leh
iyo horumar la taaban karo. Cid kasta oo gacan ka gaysatay ha guulaysato!
Inta aan nasiib
u yeelan in ay nala joogaan, waxa aannu leenahay: “Macal asaf” qoraal kuma soo
koobi karno wacdaraha meesha ka bilawday iyo arooska aannu galnay ee hawada
nagala socda!
Saddaam Carab
Hargeysa, Somaliland
Kommentarer
Skicka en kommentar