Buugga afsoomaaliga lagu qoro iyo akhristihiisa soomaaliyeed waxaa dhexyaalla xayndaab weyn. Isma gaadhaan, oo buugguna qol buu ku daayimaa akhristuhuna cidluu fadhiyaa oo kuma baraarugo erayga qoran iyo wuxuu ka dheefi lahaa. Qorayaasha afsoomaaliga wax ku qora tacab koodu wuxuu u baahan yahay in gacanta laga saaro akhristihii. Kolkaasi ayuu buugguna buug noqonayaa, qoruhuna uu ogaan karayaa farriintii uu buuggu siday heerkay taagnayd. Akhris ku guud ahaan waxa uu la mid yahay dhammaan baahiyaha kale ee nooluhu u baahan yahay goor walba. Weliba akhrisku waa baahi maalin leh ah ama goorwalba taagan.
Haddaba barnaamijka lagu magacaabo Somali Week Festival oo sannad leh ah laguna qabto magaalada Landhan ee cariga Iglan waxa uu kulmiyaa dad ka soomaaliyeed iyo xadaarraddoodii dhaqan, suugaaneed iyo weliba aqooneed. Waxaa loogu yeedhaa Toddobaale (Week) haseyeeshee waxa uu si rasmi ah u socdaa toban cisho. Tobankaa habeen ayuu intaasi meel iskugu keenaa. Habeennadaa koobani waxay hiil u yihiin oo ay soo aakhiro toosiyaan dhammaan qaybahaasi iyo halabuurkoodii. Intii ka dambaysay burburkii, Somali Week Festival waa goobta keliya ee sannadlaha ah ee la isku xasuusiyo laguna kaydiyo dhaxal kii dadka soomaaliyeed ee buug lahaa, ee suugaan lahaa, ee aqoon iyo xaddaarad kale lahaa.
Habeenkii ay taariikhdu ahayd 25 kii Oktoobar, waxa uu ahaa habeen loo gaar yeelay in buugga iyo akhristuhu ay is arkaan. Habeenkani waxa uu caddeeyay in dayrka u dhexeeya akhristaha iyo buugga la dumin karo. Run ahaanna dayrkaasi habeenkan wuu dumay.
Waxaa ka soo qayb galay qiyaastii labaateneeyo qoraa oo soomaaliyeed iyo buugtii ugu dambaysay ee ay qoreen. Waxay ka kala yimaaddeen dalalka Norway, Iswiidhen, Denmark, Maraykan, Kanada, Talyaaniga, Jabbuuti, Finland, Imaaraadka oo ay kusoo biireen qoraayadii dalkan UK deggannaa. Sida loo agaasimay iyo siday codkooda u gaadhsiiyeen ka soo qayb galayaashii ayaa iyaduna ahayd hab cusub oo xiiso badan. 10 ka mid ah qoraayadaas mid waliba waxa uu wax ka akhriyay buuggii ugu dambeeyay ee uu qoray iyo buug uu qoraa kale oo aan isagu goobta ku sugnaynni uu qoray.
10 ka qoraa iyaga oo midi ba meel gaar ah taaganyahay ama fadhiyo ayay kol keliya akhriska isku dareen oo kor u wada dhawaaqeen. Tiyaatarkii ayaa qaylo isla oogsaday!. Kasoo qayb galayaashii oo aan waxba loo sii sheeginna afkay gacanta wada saareen. Dhegtooduna waxay haleeli wayday in ay buugtaa mar la wada akhriyay wax ka maqasho. Kolkii qore waliba uu dhowr tuduc cirka kaga dhawaaqay iyaga oo aan isdhagaysannayn ee waxba laga fahmi waayay, ayay haddana aayar aayar hoos u dhigeen codkoodii sidii raydhyow sii falaagaya. Markuu codkii dhammaaday, waxaa iska sii watay mid ka mid ah qoraayadii oo si wacan u maqashiiyay ka soo qayb galayaashii. Sidaasay ku wareegtay oo kolba akhriste qayb ka mid ah buuggii uu qoray iyo mid uu qore kale qoray dadkii u maqashiiyay. Kolkii ay dhammeeyeen, waxay haddana wax ka sheegeen buuggooda ay subciskaasi kaga qayb galeen iyo buugga aannay qorin ee ay dadka maqashiiyeen.
Ugu dambaynna waxaa dadweynnihii u soo koobay ujeedada uu habeen kaasi lahaa Jaamac Muuse Jaamac oo ah isku duba-riddaha barnaamijkaasi. Waxa uu iftiimiyay in ujeeddooyinka laga lahaa jilista noocan ahi ay ahaayeen saddex arrimood oo waaweyn:
1. Kolka buugta la subciyay ee qorayaashu mid waliba isaga oo aan dhegaysannayn ka kale uu buuggiisii iskaga dhawaaqay waxaa looga jeeday sida aannay soomaalidu isku dhegaysan kolka ay meel iskugu yimaadaan. Ugu dambaynna halkaa looga dareero iyada oo aan waxba la kala faa’iidin.
2. Akhriska dambe ee uu qore keli ahi maqashiiyay qayb buugga uu akhriyay ka mid ahina waxay tilmaammaysay, in akhristuhu uu la saaxiibi karo buugga, oo la sheekaysan karo, buuqa madhanna kaga maarmi karo. Sidoo kale waxa ay markhaati u ahayd in qof wax akhriyay uu haysto waxa uu gudbiyo oo dadka u sheego.
3. Qodobka saddexaad waxa uu ahaa mid isna guul weyn habeenkan u ahaa buugga iyo qoraha ba: waxa uu isku soo dhoweeyay oo gacmaha isku saaray buuggii iyo akhristihii. Waxa uu noqday habeen ay is gaadheen oo kulmeen buuggii iyo akhistihii.
W/Q, Mustafe Aadan Nuur
manmustafa@gmail.com
London / UK
Kommentarer
Skicka en kommentar