Maalintii, ugu danbaysay sannadkii tegey 2013, iyo soo dhoweyntii 2014, kala-wareeggii sannadka ayaa lagu dhawaaqay in Ururka Qorayaasha Somaliland oo toban jirsaday, uu ka hawl geli doono, dalka gudihiisa. Muddada tobanka sannadood ku sinnayd, waxa xarun u ahayd carriga Iswidhan, oo ah goobtii lagu aasaasay. Dhammaan inta jecel horumarinta qalinka, midaynta, af-qoraalka, dood-wadaagga hufan, soo saaridda buugaag wax tar leh, dhiirri gelinta da'yarta soo koraysa, ee jecel in ay wax qoraan. Waxa uu ururkani u yahay muraayaddii ay iska dhex daawan lahaayeen. Cid ka xigtaana, ma jirto, waa uun in aad buuxisaa, tiirarka uu ka dhigtay xeerka.
Ujeedada koowaad baaba ah, in la dhiirri geliyo, qorayaasha, oo dhan. In la is garabsado, oo la iska caawiyo, wax yaabaha la xidhiidha, qalinka iyo khadkiisa.
Lagama maarmo, talo iyo is tusaalayne, waa gole uu ka dhalan karo, horumarka afka iyo dhigaalkiisa. Waa goob lagu xannaanayn karo afka soomaaliga ee dhaawacyada badani ku yaallaan. Haddaba, waxa noo farxad ah haddaanu nahay Ururka Qorayaasha Somaliland, gaar ahaan laantiisa Iswidhan, dedaalka dheeraadka ah ee uu ku tallaabsaday muddadii yarayd ee ururku uu dalka gudihiisa ka jiray. Ilaa laba tababar, oo ku saabsanaa, hab-dhigaalka afsoomaaliga, oo loo sameeyey dhallinyaro kor u dhaaftay 40 iyo kulankan ugu danbeeyey oo ahaa isbarasho, uu Ururku kulansiiyey qorayaal deggen dalka gudihiisa, kuwo hore isu yaqaannay iyo xubno dusha uun iska yaqaannay. Halkaana ka helay xog dheeraad ah oo ku saabsan Ururka Qorayaasha Somaliland.
Waxa aanu leenahay hambalyo, kulankaas iyo dhammaan intii ka soo qayb gashay-ba. Waxa aanu si gaar ah, u hambalyeynaynaa guddoomiyaha Ururka Qorayaasha Somaliland Axmed Ibraahin Cawaale, ku xigeenka, Khaalid Jaamac Qodax iyo xoghayaha guud, Saddaam Xuseen Carab.
Guddoomiyaha Ururka Qorayaasha Somaliland laatiisa Iswidhan.
Sayid-Axmed Maxamed Yuusuf
14-04-2014 Stockholm/Iswidhan
Kommentarer
Skicka en kommentar