Indho Ama Dhaayo: 150 Erey Oo Ah Tilmaamaha Af-Somaliga Ee Indhaha U gaarka Ah...W/D, Ali Mohamoud Noor

Waa isku daygii baadhitaan ee noociisa oo kale u horreeyay ahna mid la odhon karo wuxu joogaa marxalad bilow ah oo dhammaystir u baahan. Daraasaddan ayaa ah mid koobaysa dhinac kasta oo xidhiidhinaysa afka hooyo iyo xubinta jidhkeenna u qaabbilsan lexaadka aragga.

Waxa aan is leeyahay qormadani weli maaha kama dambays siiba qaybaha aan u kala qaaday oo aan dareensanahay in qabyo ka muuqato in kasta oo aan u dhigay sidii ay aniga iila muuqdeen balse mawduucan ayaan jeclaystay inu noqdo mid furan oo aan bulshoweynta la wadaago si ay dadka af dhaadhiga ahi halkaa uga sii ambaqaadaan oo halka ay hadda wax marayaan looga sii horumariyo wixii aan ka tegayna loo dabooli karo si jiilalka soo kacaya ay ugu noqoto aqoon korodhsi guud oo ay ka baran karaan wax kasta oo qodobkaasi isaga ah ku saabsan.

Akhriste waxan kuu rajayaynayaa in aad xiisayn doontid qormadan marka aad akhrido islamarkaana aad ka dhiiban doontid talooyin wax ku ool ah.

A) Awoodda indhaha

Arag, eegmo, deymo, daawasho, dhugasho, dheehasho, fiirin, hoomaayid, indho-caddayn, indho-daalis, cawri, il, ildadab, il-qooraansi, ilqoodh, indho-indhayn, indho-ku-hayn, akhris, muuq, dhaayo-qab, indho-fiiqnaan, fay, dam, ujeedid, jeedaalo, khaawisaad, il-doogsi, indho-ku-gubid, il-qalloocan, bogasho, biniin.

B) Hawlaha kale ee ay indhuhu qayb muhiim ah ka yihiin fulintooda.

Sanqasho, oohin, ilmo, hurdo, gama`, himsehimse, haydh-haydh, dhacdiid, laamadood, lulo, libiqsi, baraarug, gawdiidsi, indho-furid, il-jabin indho ku godid, indho-shiikhin, indho-shareer, indho-dillaacsi, indho-saab, shish, dhugtan, fogaan-arag, bidhaan, bikaacsi.

C) Naanaysaha ay Somalidu ku ladho isha ee dadka loo bixiyo

Shiine, cawar, hebel indho, indhoole, Indha-cade, Indho-sheel, indho-weyne, Indho-leeb, indho-caad, il-dhafuujo, indho-deero, indho-deeraley, dhaayaha-u-roon, indhobir, indho-yare, indho-buur, indho-waranle, indho-godane, indho-xume, indho-deeq, indho-fiig, ildab, illow, iley, ileeye, ilxaako, ilxun, il-xayiig, fayax, il-qudhaanjo, il-dhibiijo, indho-badane, il-bir, afar-indhood, aragsan.

D) Sifooyin kale oo xidhiidh la leh indhaha

indho-ku-graadle, ildheeraan, il-biyood, il-waad, ileys, illin, iftiin, ilbidhiqsi, ilaalo, indho-daar, indho-ka-rid, indho-iska tuur, il-ka-lalin, il-duuf, il-qabatiin, il-fashaq, indho-sarcaad. Indho-daraandar. il-maris, indho-furnaan, argti-gaaban, indho-fidin, il-bixid, il-darro, il-go`, ilxumaan.

E) Maahmaahyo, halqabsi iyo odhaah la xidhiidha indhaha.

Loo il-bixin maayo

kor waayeel waa waa indho 

dab kuleylkiisa aan la arag dambaskiisa lagama leexdo 

aadame la aragyaaba dhib la arag

isha cali ka laalladda

indho adagaa ma il kalluun buu liqay

iyo qaar kaloo badan oo idinku ku sii kordhin doontaan.

qofkii baxaya indhahaa casaada

D) Xanuunada la xidhiidha indhaha

Habeeno, bakooro, indho-beel, indho-laàan, indho-darri, dhaayo la`, indho-barar, xafajo, dhalaad, sheel, ashqaro, raar, beyr, indho-jeexis, indho-fiiqis, bassaas,daaf.

F) Qurxin

Indho-kuul

G) Waxa iyaguna isha ku leh saamayn toos ah ama mid daban siiba cimilada iyo dabeecada iinagu xeeran iyo deegaanka.

Iftiinka qorraxda, mugdiga, siigada, qiiqa, ceeryaamada, hanfiga, dabaylaha . roobka, dhididka badan, saamaleylka, huurka, barwaaqada.

Soo diyaarintii iyo isku dubbaridkii

Ali Mohamoud Noor Ali-Eid

...........Norway