GABAY BAROORDIIQ AH: “Meygaag halyey buu ahaa loo hammuun qabaye” ...W/C, Cabdiraxmaan Muxummed Maxamuud (Cawlo) 02/2011/ UK

Gabaygan hoosta ku qoran waxa tiriyey Cabdiraxmaan Muxumed Maxamuud (Cawlo) oo deggen carriga

Ingiriiska. Waxa uu tiriyey maalmihii la soo sheegay geerida marxuum Ibraahin Meygaag. Waxa uu gabaygani noqonayaa inta aan arkay kii ugu cuslaa ee markiiba laga tiriyey geeridii marxuumka. Abwaanka curiyey gabaygan oo aqoon u lahaa Ibraahin, waxa uu inna hogatusaalaynayaa qaababkii uu ku yiqiin marxuumka.

Waxa uu si farshaxannimo ku dheehantahay inoo tusayaa sida ay geeridu u tahay lama gefaan, oo naf waliba ay dhadhamin-doonto mar uun. Dhinac, waxa uu ka xusayaa in dalka iyo dadkaba uu ka baxay halyey loo hanweynaa. Waxa uu gabayga ku soo af-meerayaa duco uu Ilaahay uga baryayo marxuumka in uu jannadkii ka waraabiyo. Waxa gabaygani uu soo baxay bilawgii bisha labaad ee sannadkan 2011-ka, intii aan la aasin marxuumka.

Waxa uu yidhi:

Waa lama huraan geeridiyo, hoyga aakhiro e’
Hayeeshee huqbay leedihiyo, hibasho gooniya e’
Hiirtaanyaday kugu dishaa, hadhiyo laylkiiye
Maygaag halyey buu ahaa, loo harraad qabaye
Alaylahe haldoor baa ka baxay, hanadadeeniiye
Hakad baa Rashiidaw ku yimi, horumarkeeniiye
Suuganta hodanka ah murtida, heli ogaanteeda
Hawraar odhaah iyo farshaxan, hoga tusaalaynta
Kalahaadintiisiyo naxwaha, kala hufnaantiisa.

Garashada hugeediyo sarbeeb, hadala raac raaca
Hilaad iyo aqoon iyo waxgarad, hawlkar iyo daacad
Hufnaan iyo mudnaan iyo hab dhaqan, geesi lagu hiisho
Iyo hoga tusaalaha gartiyo, guurti ma huraan ah
Geed hadhaca oo la hadhsadoo, hiifta lagu reebo
Hayin dhaansha oo maatadiyo, beel harraad tire ah
Halka aad ka eegtaba gadhqaad, libinta soo hooya.
Hadday liicdo oo aad dhibiyo, halis ka yaabayso
Ku hagoogashada dhiilladiyo, hoy isugu gaynta
Hal karaanka isu soo hagiyo, nabad heshiisiinta

Halgan run ah hayaan meelmariyo, heegan lagu seexdo
Higsad iyo olole hurinta iyo, haybad lagu guuro
Hami lagu baraarugo markay, hawl waxqabad joogto
Hindisaha tilmaan iyo odoros, himilo joog dheer leh
Hadal deeq leh, isu-soo hilaw, dhiirri hana qaada.
Hogol curatay harahoo biyo leh, waqal hareer joogo
Baaq hodan ah hirar kuu baxoo, lagu hayaamaayo
Kooshinaw hoggaan buu ahaa, heer u joogaba e’

Inkastoo heddiisii gashoo, laga horjoogaynin
Allaylehe halbawlaa badh go’ay, loo hamuun qabaye
Allaw hoyga Aakhiro jannada, hagar la’aan seexi
Inta NEBIGA (SCW) meel la hadhsatee, Cali hareer jiifi.
Eebow halaagiyo dhibtiyo, hoogga ka ilaali
Eebbow adaa hodana oo, deeqda noo hura e’
Eebbow haleelada jannada, hoyga u ballaadhi

….Aamiin……….Aamiin……….Aaamiin

------------------------------------------------
Xigasho: Buugga Milicsiga dagaalkii 1988kii