Maamulka shirkadda miyaa igu aamini weydeen? "gacmaha ayuu dhabanada saaray! / 13-07-2010

Waxa uu fadhiyaa barandaha aqalkiisa, waa uu yaabbanyahay. Dhabanada ayuu gacmaha saaray, waanuu maqanyahay, balse, waa kan fadhiya ee kursiga quruxda badan ku fadhiya. Goor danbe ayuu ku war helay " Waar shaaha maxaad u cabbi weyday sawkan qaboobay!" oo ay xaaskiisa oo ag fadhida ku leedahay,----Yaa oo miyuu qaboobay, dee mid kale ii keen--- maxaan kuu keennaa waa kii saddexaad ee aan kuu keeno'e. Maxaa kugu dhacay ee aad la fikiraysaa? Mar haddii maamule lagaa dhigay, maxaa kaa maqan ee kale, sawtaad weligaa odhan jirtay haddii maamulkaa Shirkadda la ii dhiibo, wax badan baa ii muuqda oo aan qaban lahaa, dabcan dee waa aad ka nasan lahayd hawshii badnayd, miyaanay sidaa ahayn xaaji, maxaad la fekeraysaa. Warsame Gudaal, ma uu jawaabin ee waxa uu ku adkaystay in koob kale oo shaah ah loo keeno. Waana loo keenay. Markii uu laba jeer cantuugay buu yidhi: " Yaa--maxaad lahayd, ma anigaad ila hadlaysay?     Warsame, waa oday madaxa la sii gelaya siddeetankii. Wax badan ugama hadhin siddeetanka, laakiin waa nin xoog ah oo geed adayg u dhashay. Tan iyo maalintii uu labaatan jirsaday waxa uu ahaa nin isagu is maamula oo dhaqaalihiisa la soo baxa. Waxa uu bilaabay yaraantiisiiba in uu wax barto, oo waxa uu waxbarashada ka gaadhay meel sare oo aan xilligaa cidiba higsan jirin. Waa dhallintii ku kacaantay wadaniyadda iyo dedaalka horumarka. Kolba heer la soo maro-ba waxa uu ka soo shaqeeyey shirkado farabadan oo uu qaar isagu aasaasay, qaar kalena uu shaqaale ka ahaa. Dhawr shirkadood ayuu maamulka sare ka hayey siddeetamaadkii, laakiin waxa uu markasta ku hamiyi jiray shirkadda ugu weyn in uu maamule ka noqdo. Waxa uu u arkayey in uu waxbadan ka bedeli karo. Marka la eego waaya-aragnimadiisa, aqoontiisa, raganimadiisa, geesinimadiisa, codkarnimadiisa iyo dad la tashigiisaba waxa lagu xaman jiray in ninkaasi noqon karo nin maamuli kara shirkadda la magac baxday "Daryeelka Danyarta iyo Danta guud."     Sababo fara badan ayaa loo cuskadaa in uu Warsame Gudaal ku habboonyahay maamulaha Shirkaddaas. Dadka qaar baa yidhaahda---tan iyo maalintii uu dugsiga sare ka baxay, ilaa maanta oo laga joogo 50 sannadood, dan guud mooyaane dan gaar ah maba uu qaban, haddii uu qabtayna mar kasta danta guud buu ka horraysiin jiray tiisa gaarka ah. Sidaa darteed waa ruug caddaa haya xog farabadan, iyo qaabka loo maamulo Shirkadaha waaweyn. Dad kale oo badan ayaa aaminsan in uu mar horeba xaq u lahaa in shirkaddaa loo dhiibo. Waxaase jira qaar kale oo iyagu u arka in aanuu ku habboonayn maamulka Shirkadda "Daryeelka Danyarta iyo Danta guud". Si kastaba xaalku ha ahaadee, waxa jiray rag iyo dumarba dad la halgamay oo dedaal dheeri aha la sameeyey sidii uu buurta figteeda u kori lahaa. Markastana waxa ay ku odhan jireen, " Annagu waxba kaama rabno, ee waxa aanu rabnaa isbeddel in lagu sameeyo shirkaddaas oo noqotay mid aan faa'iido soo saarayn"     Maanta hadhqoodaarka uu fadhiyo waxa uu ku sugayaa rag ka mid ah raggii la halgamay laakiin mar kasta lahaa danta guud ayaanu kuula soconnaa. Shalay kuwo kale ayaa u yimi, dorraad gurigaba laguma kala bixin, tii ka horreysay waabuu ka baxsaday guriga. Tan iyo maalintii loo magacaabay maamulaha shirkadda, laba indhood isuma uu keenin. Indhihii yaryaraa ayaa sii yaraaday. Inkasta oo uu u dhashay geed adaygnimo oo soo jeedku aanuu waxba yeeli jirin, waxa aad mooddaa in da'dii iyo hawshan aanuu weligii qaban ay ku kulantay. ---Yaa garaacaya...waa ayo! --- Ka fur waa niman aan sugayey'e. Asalaamu calaykum...Wa calayku wasalaam. Soo fadhiista, yaa, oo intii aynu isku ogaynba waa ka badantihiine, dee shan kursi oo kale aan inoo keeno. Maya fadhi annagaa ayaa soo qaadanayna'e. Ilaa 20 nin ayaa daaradii soo fadhiistay. Waxa la socda afar nin oo ka mid ah raggii ugu dhodhowaa dhinaca Warsame xilligii loo qalqaalinayey sidii uu Shirkladda madax uga noqon lahaa. Hadalkii bay bilaabeen. " Dee wakhti badan ma hayside waxa aanu kuula soconnaa in aad hebel iyo hebel aad u magacwdo agaasimayaal" Nin kale ayaa hadalkii ka boobay oo yidhi: " Waxa ay ahayd in aanu ku nidhaahno afar agaasime iyo weliba ninka suuqgeynta alaabta shirkadda ee mar haddii aad soo koobtay maamulkii shirkadda, sida nagu maqaalo ah, dee waxba kugu dirqiyi mayno'e labadaas uun hadal ha ka keenin. Warsame Gudaal oo daal iyo diifi ka muuqato ayaa marka uu u hollado hadalba waxa hadalka qaata mid kale, isagoo isleh yaa kaa dhaqaajiya uun, bay marqudha wada yidhaahdeen, dee waa innoo sidaa. Nabadgelyo, nabaadiino, tusan, iyagoo sii gacanqaadaya odayga.    Todoba maalmood oo la soo dhaafay waxa u yimi ilaa 70 kooxood oo la mid ah kuwa imminka ka agkacay. Waxa u hadhay ilaa soddoomeeyo kale. Dhibaatada odayga haysataa waxa weeye, in aanay jirinba cid la talinaysa, cid dantii guud ee ay ka hadli jireen ka hadlaysa, cid wanaag guud doonaysa baan jirinba. Dhammaantood waxa ay ka hadlayaan waa isku mid. Waana si shirkadda ay dhammaan uga mid noqdaan maamulkeeda. Oday Warsame, berigii hore arrimahani umaba muuqan. Maantase talo ayaa ku caddaatay. Ballamo badan buu qaaday, qaar waa buu illoobay, qaar kale waa uu xasuusanyahay, qaar waa lagu qasbay. Weli mabuu u shaqo tegin shirkadda madaxda looga dhigay ee durbaba intaasoo hawlood uu dhexdabbaashay. Weli kadinkeedaba ma uu istaagin. Hore looguma ogayn in uu gabyo--waa se uu tirinjiray maansada oo isaga ayuun baa dhegaysan jiray maantase waxa uu rabaa in lala maqlo maansadiisa gaaban. Ma siddeetan guuraa Da'daydii ku siqaysaa Anigoo sebi ah Subaxaan suntaday Miyaan saaka joogaa Sirtii iga daboolayd Xalay miyaan ku sarakacay,  Dadku hay saluugee Danyar ma u sadburiyaa Mise sararaweyntaan Suubbaa salaax-iyo Sunuudana u badiyaa Kuwa soo socdaaliyo Safka yurub ayaa badan Tolow sidaan ka yeelaa Waxba yaan sahwiyine Allaan talada saaroo Danytartana sidii hore Ballanteenu waa samo. ---------------------------------------------------------------------------------------------------------------- ------------------------------------------------------------------------------------------------------------ Qore: Sayid-Axmed Dhegey gacanlibaax2001@yahoo.se Sweden--13-07-2010