Xusuus qormo hore: "Oxford House iyo habeenkii qorayaasha 13/10/2008/London". W/Q, Sayid-Axmed M Yuusuf

Maalintii bishu ahayd 13, bishii tobnaad ee sannadka 2008 ayaan u diyaar-garoobay in aan ka qayb-galo kulan ka mid ahaa kulamadii socday muddadii todobaadka ahayd, oo ka socday Oxford House/London. Debbaal-deggaas oo loogu yeedhay (Debbaaldegga todobaadka soomaalida) waxa ka soo qaybgalay dad aad u tirobadan

, oo ka kala yimi dalal aad u kala fog. Inkastoo aanaan anigu ka qaybqaadan dhamaan maalmihii debbaaldegga, balse waxa igu maqaalo ahaa in ay ka soo qaybgaleen odayaal ay ka mid yihiin Maxamed Xaashi Gaarriye iyo Aadan Tarabi. Waxa aanse nasiib u helay in aan arko Cali Sugulle, oo habeenkii Qorayaasha ka soo qaybgalay.

     Waa soomaali iyo caadadeed (ceebteeda ma aha) waxa dib looga dhacay kulankii muddo aanaan garanayn oo malaa ka badnayd laba saacadood. Taasi waxa ay keentay in wakhtigu cidhiidhi noqdo. Madasha oo ay qorayaasha qaar ka mid ahi, u sii diyaargaroobeen ayaa aad u saluugsanaa wakhtiga la siiyey oo ahaa 5-10 daqiiqadood. Inkasta oo wakhtigu sidaa u yaraa, balse waxa tilmaan mudan in aan lagu caajisin goobtii, ee si darandoorri ah loo soo gebagabeeyey.

    Si gaar ah ayey xasuus iigu tahay aniga. Waxa aanu habeenkaa fool ka fool isu aragnay saaxiibkay Cabdilaahi Cawad Cige oo habeen kaasi aragti ahaan isugu kaaya horreeyey, balse aqooni naga dhexaysay muddo haatan ku dhow 10 sannadood. Waxa kale oo aan halkaa kula kulmay Abwaan, Faysal Cambalaash, Marwo Caasha Luul, Ayaan M Cashuur iyo xubno ka yimi Hargeysa oo uu ka mid ahaa Abwaan Axmed Aw-Geeddi. Madashu way cammirnayd, aadna waa loo soo agaasimay.

    Habeenkaa waxa aan is idhi, soomaalidu qoraalkii bay u soo jeesatay. Waayo, goobtii waxa ka hadlay tobaneeyo qoraa oo buug kastaaba uu ka geddisnaa buugga kale. Tusaale ahaan, buug laga qoray Geela, mid laga qoray ganacsiga, mid laga qoray afsoomaaliga, mid laga qoray dhibaatada soomaalida haysata, mid taariikh ah iyo qaar kaloo badan. Taasi waxa ay tilmaan u tahay bidhaan soo baxaysa oo ah in loo soo jeestay qoraalkii. Buugaagta ha la iibsado ama yaan la iibsane, goobtaasi waxa ay ahayd goob lagu soo bandhigay buugaag aad u tirabadan, oo aanaan halkan ku soo koobi karin. waxaana runtii ugu mudnaa in la tilmaamo labada buug ee dhowaan soo baxay oo lahaa mudnaantooda. Buugga Hal aan tebayey oo ku saabsan abwaankii, halgamaagii Xaaji Adan Afqallooc oo uu qoray Maxamed Baashe Xasan iyo buugga “Roge” oo uu qoray Cabdillaahi C Cige. Waxa aan leeyahay hanbalyo Cabdillaahi iyo Maxamed ba. 

Ugu danbayn waxa aan hanbalyo u dirayaa bahda Oxford House ee soo abaabushay kulamadaas, gaar ahaan Ayaan M Cashuur. 

Sayid Maxamed Yuusuf 

Stockholm/Sweden
Xigassho: www.qoraaga.com