Waxa dhowaan lagu qabtay Hotel Almis ee Magaalada Hargaysa Kulan Afureed ay soo qabanqaabiyeen Ururka Qorayaasha Somaliland ee Fadhigoodu yahay Dalka Sweden, Kulankan oo ay Goob Joog ka ahaayeen Badiba Naadiyada ka Dhisan akhriska ee ka dhisan Dalka Gudihiisa ayaa waxa si qoto Dheer loo falanqeeyay sidii kor loogu qaadi lahaa Aqoonta Naadiyada u heellan Dhiiri gelinta Akhriska iyo Qoraalka. Qorayaasha Somaliland oo Qurbe iyo gudahaba, kulankan ka soo qayb galay ayaa Waxa Goob joog ka ahaa Qoraa Maxamad Xirsi Guuleed (Cabdibashiir) Xasan Cabdi Madar iyo Cabdillahi Cawad Cige.
Ugu horayn Masuul ka tirsan Naadiyada Akhristyaasha oo Hadalka Furay ayaa ururka Qoraaga ee reer Somaliland uga Mahadnaqay kulan afureedan ay isugu keeneen Naadiyada,aadna ay ugu Baahnaayeen Naadiyadu. Qoraa Maxamad Xirsi Guuleed oo Masuulka Naadiyada ka dib hadlay ayaa Muujiyay Dareenkiisa Farxadeed ee ku Waajahan sida qiimaha leh ee Naadiyadu ay Kulankan uga soo qayb galeen, isaga oo tilmaamay in Kaalinta Naadiyada ee Dhiirigelinta Akhriska iyo Qoraalku tahay Masuuliyad Qaran oo ay Dusha u riteen iyada oo dhalinyar oo soo kacaysa, ayna Waajib tahay in la barbar istaago, xidhiidh fiican lala yeesho la dhiirigeliyo, isaga oo tilmaamay inuu Qurbaha uga yimid si uu kulankan ula yeesho Naadiyada oo uu aaminsan yahay inay Mudanyihiin in meelo ka sii fog looga yimaado si waxna looga dhegaysto waxna loogu kordhiyo.
Afurkii ka dib ayaa waxa Jilbaha la isku dhigay in la falanqeeyo Xaalka Guud ee ay ku suganyihiin Naadiyadu, iyadoo Naadi kastaa soo diyaariyay Mushkiladaha ku xeeran ee uu u arko inay caqabad ku yihiin Horumarka naadiga.
Qoraa, Xasan Cabdi Madar oo isna dhalinyarada Falanqayntii Mushkiladda ka dib Talooyin Siiyay, ayaa Tilmaamay in Naadiyadu waxbadana qabteen, wax badana u dhimanyihiin oo loo baahan yahay inay la Jaanqaadaan Qaabka Dhiiri gelinta Akhriska iyo Qoraalka ayna Muujiyaan Maskax fayaw oo wax curin karta.
Qoraa Cabdillahi Cawad Cige, oo dhowaan ka yimi Carriga Ingiriiska, ayaa isna Dhalinta uga garaabay Mashkiladaha isbiirsaday ee ay ku soo bandhigeen kulankan Xog waraysiga sheegayna in Naadiyadu intii looga baahnaa iyo in ka badanba ay qabteen hadda se halkan la taaganyahay ay tahay hawl u baahan Waajibaad culus. Qoraa Maxamed Xirsi, oo kulankan Naadiyada ku martiqaaday ayaa Xog ururintii ka dib tibaaxay inuu Iswaraysigan iyo aqoontan la kala faaiiday ku kaydin doono Xaruntii Ururka Qoraaga Somaliland sidoo kalena ay Masuuliyiinta Ururku isla eegi Doonaan Habaka ugu haboon ee Hawsha Akhriska iyo Qoraalku midho dhalis ku noqon karto.
Ugu dambayntii Naadiyada iyo Ururka Qorayaashu waxay isla meel dhigeen in iskaashi fiican ka dhexeeyo isla markaan loo baahanyahay in la fuliyo Barnaamijyo wax ku ool ah.
------------------------------------------------------------------
// Naadiyada Akhristayaasha Somaliland, Hargeisa
Kommentarer
Skicka en kommentar