Waddo cusub oo u furantay Naadiyada Akhriska iyo Ururka Qoraaga Somaliland. W/Q, Khaalid Jaamac Qodax

Xalay oo taariikhdu ahayd 14-08-2013, (Maalintii Arbacada, habeenkii Khamiistu soo gelaysay, waxa aan ka qeyb galay kulan ay soo qaban qaabiyeen Ururka Qoraaga Somaliland iyo Naadiyada Akhriksa ee Somaliland ka dhisan. Kulankan oo ah kii noociisa ah ee ugu horreeyey ee waxtar leh ee aan abid arko qoraayaal u heelan in ay dhiiri galiyaan da’ yarta soo koreysa, ee rabta iney wax qoraan. Waxa madasha runti aan jeclahay inaan u dhaafo warbixinno badan oo qurux badna oo laga qori doono, hayeeshee, waxa aan jeclahay inaan laba qodob uun ka horreysiiyo.

Ta koowaad oo ah in qorayaasha xubnaha ka ah Ururka Qoraaga Somalialnd ee saldhigiisu yahay Sweden ay jiraan xubno u heelan, in ay hoo iyo hiil-ba la garab taagaan yihiin fidinta ereyga dhigan, oo aaney ka aheyn shaqo iyo mashruuc, taasi waxa ay xalay I tustey in UQS oo xil adag iska saarey sidii uu u taageeri lahaa da’ yartaa soo koreysa ee u baahan gacan qabashada. Halka qoraayo kale arrintaasi si kale ugu muuqato. Si kastaba ha ahaatee talaabo horusocod ayey xalay ku dhaqaaaqeen UQS oo aan nooceeda hore loo arag, waxaanan ku aamaanayaa dhammaan intii xilka adag iska saartey arrintaasi oo uu u horreeyo Maxamed Xirsi Guuleed iyo Sayid Dhagey iyo waliba cid kasta oo

taageero ku lahayd qabsoomidda xafladdaasi.

   

Ta labaad oo ahayd inaan madasha ku arkey buug uu qorey Amiin Xasan Cabdi Madar oo  ah wiil aad u da’ yar oo uu dhalay Agaasimaha Madaxtooyada JSL , oo xubin ka ah UQS. Waxa I soo jiitey in Xasan uu wiilkaasi ku barbaariyey aqoon iyo waayo aragnimo fiican, oo midhaheedii xalay la arkey. Waxa aan Xasan leeyahay, mar haddii aad siyaasad u tafaxaydatey kuyuuguna kugu yar yahay oo aanad sideyda oo kale aheyn wiilkan yar u bannee madasha ha soo galee.

  Sida cad, waxa hubaal ah in hadda laga bilaabo ay furantey waddo hor leh oo lagu dhiiri galin doono qoraayaasha da’yarta ah, iyo in UQS iyo Naadiyada Akhrisku ay furi doonaan kulanno ka waaweyn kan, oo ay ugu horreyn doonto aloosidda iyo dhisidda madal ay ku bahoobaan UQS iyo Naadiyada akhrisku, waxaanan balan qaadayaa in taageerada ugu weyn aan dul dhigi doono insha Allah. Waxaan dhawaan shaacin doonaa heshiis laba dhinac ah oo dhex mari doona UQS iyo Naadiyada Somaliland ka dhisan oo dhan.

Xubin Ururka Qoraaga Somaliland 

Xubin Naadiga akhriska Hargeysa

Khalid J. Qodax

--------------------------------------------------