Buugga magaciisu kor ku xusanyahay ee Barbaarsame, waa buug-aqooneed si gaar ah uga hadlaya barbaarinta wanaagsan ee carruurta. Marka la yidhaahdo waxa laga hadlayaa carruur, waxaad mooddaa in dad goonni ah laga hadlayo. Maya Maya, Carruur weynaatay baad tahay, carruur ayaa aad waalid u tahay, carruurtu waa hoggaankii berrito. Bulshadu waxay ka dhisantaa xagga hoose, bal aan markiiba inoo soo qaddimo dhawrkan bayd ee arrinkaa sida fiican Toojka ugu iftiiminaya.
Marka qoyska hoos laga dhisaa qaran hagaagaaye,
Haddii meel saruun laga qabsado waa qalfoof madhane,
Dadkuna qaabaddaasoo kaluu qayb ku leeyahaye,
Qacda hore haddaan Ubadka kaca qayrka laga leexin,
Hadhow baan la soo qaban karayn qaladkay geystaane.
Gabaygaas ayaa uu qoraagu meelaha qaar soo qaadanayaa. Gabaygaas oo uu tiriyey IHN-tee Maxamed Cabdiraxmaan Xaaji Jaamac oo ku magacdheeraa LUGGOOYO. Ma mooddaa in qalinkiiba ila taraaray, buugga yaa qoray? Haa waxa qoray qoraa u banbaxay u faa'idaynta bulshada, Xasan Cabdi Madar ayaa qoray. Waa qoraa inta badan xoogga saara meelaha u baahan in bulshada laga dhiso. U fiirso, buug ka mid ah buugaagtiisii hore waxa la yidhaahdaa "SIRTA GUURKA". Maantana waa BARBAARSAME.
Buugga hore waxa uu inoo sharxay oo uu farta inoo saaray faa'iidada guurku leeyahay. Gaar haan qaababka guurka soomaalida oo uu sharraxaad ka bixiyey. Waxa uu buugga sal uga dhigay guurka habboon ee diinta Islaamkuna innagu waajibinayso. Maanta waxa uu Xasan soo gaadhay ubadkii ilaahay ka beeray guurkaas in uu iyagana la hadlo. Sidaasuu Xasan ku mutaystay in uu noqdo hoggaamiyaha qoraaga ee dhisidda bulsho wanaagsan.
Marka aad buugga dhammayso waxa aad is weydiinaysaa weydiimahan. Ma dhakhtar Cilmi Nafsiga ku takhasusay baa qoray? Ma oday waaya-arag ah oo sagaashankii kor u dhaafaybaa qoray? Ma Cilmi baadhe xilli badan ku dhexjiray baadhitaanka iyo wax ka ogaanshaha barbaarinta carruurta ayaa qoray?. Weydiimahaasi kollayba aniga maskaxdayda way ku soo dheceen. Waxa uu wax kaaga sheegayaa qaababka kala jaadjaadka ah ee uu dareemo ilmaha yari. Ilmaha Agoonka ah iyo baahidiisa ayuu kuu tilmaamayaa. Xataa ilmaha yari waxa uu dareemo ayuu farta kuu saarayaa. Waxa uu kugu baraarujinayaa waxyaabo aanaad dareensanayn oo uu ku leeyahay ka digtoonoow.
Waxa uu tusaale u soo qaadanayaa qoyska ka kooban saddex carruur ah. Ilmaha weyn, marka hore sida uu dareemo iyo koolkoolinta uu ka helo Waalidka. Marka Ilmo kale ka daba dhasho sida uu dareemo iwm. Marka mid saddexaad ka daba dhasho isbeddelka ku dhaca qoyska ayuu kuu faahfaahinayaa. Carruurtaas oo mid kastaaba si u arko xidhiidhka uu la leeyahay Waalidkiisa. Waana meelaha u baahan in Waalidku ku baraarugsanaado oo uu ka hortago is fahan-waa ka dhaca qoyska dhexdiisa. Xasan Cabdi Madar kama uu tegin in uu sheego oo faahfaahiyo dhaqanxumada ay dad badani kula kacaan Ilmaha aan ku dhalan guurka. Waxa isweydiin leh Ilmahaasi ma isagaa danbiile ah oo bulshadu ku xukumaysaa danbiga uu galay oo ah, in uu dhashay? Ilmahaasi waxa uu uga baahanyahay buslshada taageero.
Akhriste bal ila eeg meelaha uu qoraagu diiradda saaray. Bogga 122-aad waxa uu cinwaan uga dhigay USHA MACALLINKA, "Uli way qabawdaaye erey ma qaboobo" cinwaankaas waxa ku sii hoos qoran sidan: " Usha macallinku waa mid la kowsatay malcaamad quraantii miyiga. Waxa waalidku marka ilmaha ay u geeyaan macallinka odhan jireen; Jidhkiisa adigaa leh laftiisana annaga". Waxa aan u malaynayaa in ay kugu filantahay farriintaasi. Qofkii soo maray ayuunbaa garanaya. Marka ugu horraysaba Ilmaha yari waxa uu karaahiyeystaa malcaamadda, waa goobtii uu jeclaan lahaa ee naxariistu kow ka ahaan lahayd. Waxa ka mid ah qaybaha buugga BARBAARSAME kuwa hoosta ku qoran:
2. Deegaanka Ilmuhu ku noolaanayo
3. Xuquuqda Ilmaha
4. Habka Barbaarinta
5. Barbaarinta Ubadka iyo Qurbaha
Kuma koobna shantaa qaybood ee waa tusaale aan ka soo qaatay uun. Waxa uu buuggu ku gabagebaynayaa talooyin uu u soo jeedinayo Waalidka. Buugaagta noocan ah waxa la odhan karaa waa ay ku yar yihiin buugaagta ku qoran afsoomaaliga. Sidaa awgeed waxa habboon in la dhiirri geliyo oo ugu yaraan la sheego in qoraaga buuggaa inoo soo bandhigay uu bulshada ku soo kordhiyay dhigane faa'iido leh oo dhaxal u ah bulshada. Buugga jaadkaas oo kale ah waa buug-aqooneed loo baahanyahay in la akhriyo oo aan markeliya la akhriyin ee lagu noqnoqdo. Buugga aan maanta wax ka qorayo, waa buugga BARBAARSAME, oo uu qoray qoraaga caanka ah, bulsho-kaabaha Xasan cabdi Madar. Waxa aan leeyahay Xasanoow! waxaanu kaa sugnaa buugaag kale oo bulshada waxtar u leh. Waxaanu kaa sugnaa buugaag farta ku fiiqaya meelaha goldaloolada ay bulshadu ka leedahay. Bulshada aan ka hadlayaa waa bulshadeenna aan looga tegin qoranayaal hore. Maanta xoogga ha la saaro.
Guntii iyo gebagabadii. Waxa aan inoo dooray heestii macallinka oo buugga ku jirta, oo aan leeyahay Xasan cabdi Madar, keliya ma aha Qoraa ee waa Macallin:
Macallinkeen Allow kaal
Macallinkiis Alloow kaal
In kaashaba Alloow kaal
Sariir janno Aloow sii
Siddeed janno Alloow sii
Qore: Sayid Maxamed Yuusuf
05/2009 (Stockholm/Sweden)
Kommentarer
Skicka en kommentar