Sheeko gaaban: HADDAY OGAAN LAHAYD!!! W/Q, Xasan Cabdi Madar

Aniga oo maraya meel cidlo ah, la shawraya naftayda, xisaabinaya wakhtiga, waayaha ka faaloonaya, ayaan si kedis ah u istaagay. Waxa aan indhaha ku dhuftay warqad meel halkan ah taalla. Gartay inay qof ka dhacday, ka dibna is idhi bal meesha ka qaad, bal in aad cidda ay ku socoto garato si aad ugu gayso. Warqaddii ayaan ku foorarsaday, arkay inaanay gal ku jirin. Waa warqad si farshaxan leh u qoran, midabbo kala geddisan lagu xardhay, ubaxyo ku sawiran yihiin, si heer sarraysa la iskugu dubbariday. 

Intii aanan akhriyin waxa ku qoran, waxa aan aad ula dhacay muuqaalkeeda guud. Waxa ay indhahaygu jeclaysteen bal inaan si fiican u eego warqaddan iyo waxa ku qoran. Waxa aan la fadhiistay meel lagu nasto si aan warqadda u akhriyo, waxa ay ka hadlaysana u dhuuxo, illayn kuma dhammayn karo taagniye. Waxa aan fadhiistay meel halkeer ah. Waxa aan ku bilaabay bal inaan warqadda ka eego magacyo ama cinwaan bal si ay u fududaato helista ciddii lahayd, kuma arko midnaba.

Kaddib waxa aan toos u bilaabay akhriska warqadda.

Cinwaanka xagga sare waxa ku qoran:

HADDAY OGAAN LAHAYD: Dhambaal jacayl. Ku socda

tii aan jeclaa, ka socda kii wax jeclaa.

Hoos baan ugu sii degay akhriska warqadda, sidan bay ku

bilaabatay: “Waa dhambaal ka socda qof aan garanayn qofka uu u dirayo,

ka loo dirayaana aanu garanayn ka u soo diraya. Garashadu

ma aha garasho duleed. Garashada duleed marka ay tahay

sida dharaarta ayey isku garanayaan, waa garashada duunka,

garashada hoose, garashada quluubta. Warqaddu way ka tegi

doontaa ka diraya, waana ay gaadhi doontaa ka loo dirayo,

warcelintuse lama hubo in ay ka soo noqon doonto ka loo

dirayo. Waa dhambaal innaga nolol horreeyey, innagana nolol

dambaynaya. Anigu ma ahi qofkii u horreeyey ee

dhambaalkan dira, adiguna ma noqonaysid qofkii u

dambeeyey ee loo diro. Si kastaba ha ahaate waa dhambaal

geli doona buugga xusuusaha gaarka ah.

Ku bilaabid magaca Eebbe: Gacaliso, Haddii farriintani maalin uun ku soo gaadho…!Ogow!!!

…Waan ku jecelahay sababtoo ah kuma garanayo. Waad i

necebtahay sababtoo ah ima garanaysid.

Ima garanaysid maxaayeelay ma doonaysid inaad i garato;

kuma garanayo sababtoo ah ma doonayo inaan ku garto.

Indhaha ayaan isku soo qabanayaa sababtoo ah ma doonayo

in aan xumaantaada arko. Indhaha ayaad isku sii qabanaysaa

sababtoo ah ma doonaysid inaad wanaaggayga aragtid. Ma

rabo in dhegahaygu maqlaan xumaanta lagaa sheegayo, ma

rabtid in dhegahaagu maqlaan wanaagga la iga sheegayo.

Waad i necebtahay sababtoo ah ima taqaanid, ina baran

maysid sababtoo ah waad i necebtahay. Sideed u baran kartaa

qof aad necebtahay?

Waan ku jecelahay, sababtoo ah kuma aqaan, kuna baran

maayo, sababtoo ah waan ku jecelahay. Sidee baan u baran

karaa qof aan jecelahay?

Haddaad ogaan lahayd…ogaanba mayside…haddaan ogaan

lahaa..ogaanba maayee…waynu isku iman lahayn, iskuba

iman maynee; waynu kala maqnaan lahayn, kala maqnaanba

maynee!

Warku ha iga tago, hubaal wuu iga tegi, ha ku soo gaadho,

hubaal wuu ku soo gaadhi, inuu kaa soo noqonse mooyi.

Warku ha kaa yimaaddo, hubaal kaa iman maayee; ha i soo

gaadho, hubaal i soo gaadhi maayee.

Ku raaxayso akhriska dhambaalladayda. Cid kale uga

sheekee, ciddaad doonto uga sheekee, ka dhigo maad iyo

madadaalo. U qaado inaan indhaha isku soo qabanayo; oo

haddaan indhaha isku soo qabto sideen kuu arkayaa?

Ujeeddadaydu sow inaan ku arko maaha? Mindhaa adigaa

indhaha isku sii hayey oo u qaatay inaan aniguna indhaha

isku haysto! Wacnaan lahaydaa inaynu labadeennuba

indhaha kala qaadno, inaynu is aragno. Inaynu qalbiga iyo

indhaha iska aragno. In quluubteennu wada hadasho oo aynu

maskax laabashada ka gudubno. In aynu hal qof isku

noqonno.

Ma qummana in la qaato go’aan la qoomamayn

doono…..go’aanka ha hoggaamiso garasho. In badan baan

arkay dad badan oo ifka jooga oo aan weli dhalan. Ma ogi

inaad kuwaa ka mid tahay, waxase aan ogahay in aynu laba

adduunyo ku kala noolnahay.

Muxuu yidhi Saahid Qamaan? …Ninkii aniga iga maarmi kara

uma muraad yeesho. Oo maxaynu gabaygaa uga baahannahay

maba kala maarannee? Haddaan gacal isjceliyo, is afgarashowaa

nahay, adna guri cadaawaad ku gaboobi doontaa, anna geli

shisheeyaan ku go’doomi doonaa!! Tanna ma hees bay ahayd!

Alla ma nin buu ahaa!!…Alla ma gabadh bay ahayd!!! Waa

caadadeenna inaynu fursado inna dhaafay u calaacalno.

Gunta iyo gebagebada farriintan oo farriimo kale ku sii xigi

doonaan, gacaliso, waxan ku leeyahay: Haddii isa-seeg dhaco

ducadeennu ha noqoto tii Ismaaciil Cagaf: ‘Sed iyo calaf baa

sidaa wax yidhee, i seegtaye samo ku noolow’.

Noole kulante.

-----------------dhammaad---------------------------------------